SHILLONG: Meja bilsi 2025-o Meghalaya-ona sokbagipa tourist-rangni figure-ko parakatna skangan a·dokoni hotel nokgiparang, Meghalaya-ona 1.5 million tourist-rang sokbaaha ine aganaha.
Federation of Shillong Hotels-ni president Parambir Singh Sehdave, Sombar salo kobor ra·timgiparang baksa agangrikmitingo a·dokni tourist sector namroroenga ine aganaha. Dingtang dingtang festival-rangko ong·atachi jekai Shillong Cherry Blossom Festival ba uandakgiparangko ong·atachi Meghalaya-ona bang·bate tourist-rang sokbata ine aganaha.
Minggipin a·doko adita golmal ba neng·nikatanirang sokanichi tourist-rangni sokanio nangchakeaha. 1.5 million-na bateba tourist-rang soknaba gnangchim. Niatna gita meja bilsio Raghuvanshi-ko so·otani mamlani bidingo Meghalaya a·dokni gimin ong·gija koborrangko gipataha. Uan namjabatgipa obosta ong·aha. Ahmedabad-o sildoreng kamchipani giminba manderang songreaniko dondipataha unbaksana a·songni a·briraragipa a·dokrango a·a rurongani a·selrang ong·ani gimin Meghalaya-oba uandakgipa a·selrang ong·naba donga ine manderangni bebera·ani giminba tourist-rang sokjaha.
Uandake tourist-rang Meghalaya-ona songrebaon maidakgipa neng·nika ba ra·bianirangko aganrongani gimin sing·aon, ‘tourist-rang mongsongbate traffic jam ba traffic apchangketani gimin aganronga’ ine parakaha.
Iarangni gisepon hotel chalaigipa ba nokgiparang, mikkangchi Western Bypass aro Shillong-ni flyover-ko taria matchotahaode bang·bate tourist-rang sokbatgen ine ka·donganiko parakaha.
Mingsara Shillong-ni hotel-rango ringna rongtalako man·jani a·sel suk ong·gijako parakronga. Bang·arangde borewell-ko jakkalenga ba water tank-ni chiko brena gita nanga. Una agreba songjinmao bijolini gimin neng·nikako man·ronga, hotel nokgiparang duna gni bate bijolini damko gamna gita nangenga.
Sohra-o tourist-rangna infrastructure-ko namdapate sorkari namgipa ja·kuko de·enga. Bang·en hotel aro restaurant-rangko kuliaha.
Indiba Dawki, Shillong-Dawki ramako taria matchotkujaengani gimin neng·nikao man·enga. Batanggimin bilsi 2-3 somoirangni gisepon Dawki-oba namnamgipa hotel aro restaurant-rangko kuliaha indiba ramani a·sel uamang hotel-rangko chipatna nangaha.
