SHILLONG: Meghalaya Residents Safety & Security (Amendment) Bill 2020 (MRSSA)-ko National People’s Party (NPP)-chi dilenggipa Meghalaya Democratic Alliance (MDA) sorkari, miksongmanchaen galchipaha ine Hynniewtrep Youth Council (HYC) matnangataha.
New Delhi-o Union Home Minister Amit Shah-ko grongeani somoio, a·dokni Chief Minister Conrad K Sangma aro a·dokni gipin dilgiparang, Inner Line Permit (ILP) aro gital Immigration & Foreigners Act 2025-ko man·chape dingtang dingtang niamrangni bidingo chanchirimaha aro ia Foreigners Act-o ILP gita dakgipa niamrangko on·dapna Union Home Minister, ku·rachakaniko on·ataha ine adita salrangna skangsan a·dokni Deputy Chief Minister aro Home Minister Prestone Tynsong parakatahachim.
Tynsong-ni parakatgipa kattarangna aganchakaniko on·angengon, MRRSA Bill-ko MDA sorkari, ‘bon·chipatna’ miksongmanchaen galchipaha aro iana Mukul Sangma-chi chalaianggipa gitcham sorkarikosa matnangna jotton ka·skaaha ine HYC matnangataha.
“Niamde an·tangari siaijawa indiba iako dilgiparang chu·sokatna jotton ka·gen ong·jaode maming ja·ku de·ani gri iako bon·chipatasa ong·aigen. MRSSA Bill-ko da·o somoi bon·aha ine jinmana parakanichi MDA sorkari, ia Bill-ko taridapna, mangrakbatatna aro a·bachengatna gisik nangjaha ine mesokaha,” ine HYC-ni president Roy Kupar Synrem aganaha.
MRSSA Bill-ko 2020 bilsio da·o ong·enggipa Chief Minister-ni dilanichian Assembly-ona ra·baahachim ine janapatengon, iako nipiltaichina gita Home Affairs Ministry, 2023 bilsini November jao a·dok sorkarina watpilataha aro iani ja·man a·dok sorkari, ia Bill-ko nipiltaina aro dingtang dingtang dolrang baksa agangrikna changni chang ku·rachakaniko on·aha ine Synrem parakataha.
“Assembly-o MDA sorkari, chu·onga gitan membor-rang aro somoirang donggenchimoba ia MRSSA-ko taridapna changsaba Assembly-ona ra·baa dongjaha. Iana gitcham sorkariko matnangaiachide da·o ong·enggipa sorkarini daito bon·aiaha ong·ja,” ine HYC president aganaha.
MRSSA-ko bon·chipatna on·aniara a·doko songdongenggipa Tribal-rangko chel·chakna gisik nanggijaniko mesokani ong·a ine janapatengon, a·doko niam gri napsruke songdong a·chaaniko champengna gita a·dok sorkari, India sorkari baksa bilakgipa niamko ra·gatna miksongengama ma ia niamrangko chu·gimik galchipna miksongenga, iani bidingo talataniko on·china HYC dabiangaha.
