SHILLONG: Meghalaya High Court-ni ge·etaniko man·ahani gimin, Shillong Airport-ko dal·batatna gita Ri Bhoi a·jani District Administration, January 31 tarikni gisepon a·arangko, Airports Authority of India (AAI)-na pakwate on·anggnok.
Meghalaya High Court-ni Chief Justice Soumen Sen aro Justice Wanlura Diengdoh-ni division bench, Shillong Airport-ko dal·bate tarina acre 11.75 a·arangko January 10 tarikni gisepon breaniko matchotatchina Ri Bhoi a·jani Deputy Commissioner-na ge·etaniko on·angaha aro a·arangko January 31 tarikni gisepon AAI-na pakwatchina gita a·dokni Transport Department-naba ge·etaniko on·angahachim.
A·arangko breani bidingo talatangengon, a·a nokgiparangnade District Administration, chu·gimik tangka paisarangko gamanaha indiba iana ra·gipa a·arangoni mitam bakrangde mi a·palrangsa ong·ani gimin a·a nokgiparang, Krismas aro mirangko rakuna gita somoiko ra·dapkuaha ine Ri Bhoi a·jani Deputy Commissioner Abhilash Baranwal parakataha.
Ia biaprango mitam manderangde, baditaba bilsirangna songdong a·chatokengahachim indiba ia biaprango songdongenggipa manderangko a·rikgalna nanggnok ine District Administration, a·a nokgiparangna aganmanaha.
Acre 7.725 a·arangko bredapaniko a·dokni Cabinet, re·anggipa 2025 bilsini November 26 tarikon ra·chakmanaha ine janapatengon, defence-ni acre 10.30 ong·gipa a·arangkode ta·raken ra·china gita kachari, ge·etaniko on·angaha.
Pilak neng·nikanirangkon jabrini gisepon matchotatchina gitaba Meghalaya High Court, a·dok sorkarina ge·etaniko on·angaha.
Shillong Airport-ko dal·bate tarianio ja 18-mangni gita somoiko nanggen ine ia kamko 2027 bilsini March jaode matchotgnok ine iana skangsan a·dok sorkari parakatahachim.
