Electoral roll-rangko taripilani gride gipin jatrangni election-o bak ra·aniko champengna man·jawa: NPP

SHILLONG: Electoral roll-rangko gital dake taripiltaikuja dipetde Garo Hills Autonomous District Council (GHADC) election-o Tribal ong·gijagipa manderangni bak ra·aniko champengna man·kujawa ine Bristibar salo, National People’s Party (NPP) talataniko on·angaha.
A·dokni Cabinet Minister aro NPP MLA Timothy D Shira-ni parakatani gitade, Autonomous District Council (ADC)-rangara, Tribal jatrangni namroro silroroanina aro Tribal-rangni daka rikanirangko chel·chakna on·gimin bimangan ong·a indiba skangoni ja·rikbaenggipa electoral roll-rangko gital dake taridaptaikujaskalde, Tribal ong·gijagipa manderangni bak ra·aniko sorkari champengna man·kujawa.
India a·songni jakgitelaniko man·ani ja·man ADC-rangko songchengani somoion Tribal ong·gijagipa manderangkoba electoral roll-rango segatahani gimin skangonin Tribal ong·gijagipa manderangba district council-rango, mongsongbate GHADC election-rango bak ra·pana cholko man·enga ineba Shira, talataniko on·angaha.
GHADC-ko 1952 bilsio songchengaha ine janapatengon, ua somoirango a·songni jakgitelanina pilak jatrangan ku·mong nangrime bakko ra·paahani gimin ua somoio Tribal aro Tribal ong·gijagipa manderangni gisepo maming dingtanggrikatani grisa electoral roll-rangko tariaha ine NPP Minister parakataha.
Ua somoirangonin electoral roll-rangoniko Tribal ong·gijagipa manderangni bimingrangkoba den·galkujani gimin da·o dipet district council election-o Tribal ong·gijagipa manderangni bak ra·aniko champengna man·kujawa ine Shira parakataha.
Electoral roll-rangko gital dake taripiltaiani ja·mansa GHADC election-o Tribal ong·gijagipa manderangni bak ra·anikode champengna man·aigen ineba ua agantaiaha.