KHARKUTTA: North Garo Hills a·jani Kharkutta C&RD Block ning·o donggipa Dokongsi-C songo Jal Jeevan Mission (JJM)-ni kamko matchotchipkujaenga ine songni manderang parakatenba, ia songo ta·raken JJM-ko matchotate on·china didiataha.
Jolo songdongenggipa manderangni u·iatani gitade, Dokongsi-C songo JJM-ni kamko, 2022 bilsion a·bachengahachim indiba da·o bilsibri ong·pilengahaoba kamko ka·enggipa contractor, kamko matchotchipkujaenga.
Bang·bata biaprangon JJM-ni kamrangko matchote ka·ja aro mitam biaprangode chirangko man·tokjaenga ine badi ka·anirangko man·ahani gimin dingtang dingtang JJM project-rangko inquiry dakna gita ma·mong sorkari, JJM-na tangka on·aniko dontongatchengaha ine kobor on·timgiparang u·iataha.
JJM-ni website-o parakani gitade, ia songo pilak nokdangrangnan chi pipe-rangko salmanaha aro nokdang ge·sana agrede pilakan chirangko man·tokengahachim.
Indake ong·genchimoba, ia project-ni bang·bata bakrangan matchotkujaenga ine songni manderang parakatskaaha.
“Chirangko on·na gita chi tengki damgittamko rikna nangani katta dongachim indiba biap damsao chongipa a·akosan cho·e donaiaha aro gipin damgnikode rikchipjaha. Unbaksana, songni manderangna chi rongtalako on·na man·na gita chi rongtalatgipa unit-koba tarina nangachim indiba iaba dongja,” ine songni sordar Dillipson Sangma aganaha.
Ia jolna pipe ge·gittamko donna nangachim indiba ia ge·gittamoni ge·sakosan donkuaienga aro ge·gnikode a·bachengsrangkuja ineba songni sordar matnangataha.
“Pipe-rangko a·ning gitasa ra·na nangachim indiba a·ning gita ra·jani a·sel pipe-rang nosto ong·tokengaha,” ineba ua aganaha.
Ia songni bang·bata nokdangrangnan chi pipe-rangkode chatmanaha indiba ringani chirangkode man·tokkkujaenga ineba songni manderang parakataha.
“Chi chekgipa unit dongjani a·selan wachini somoirangode chingni nokrangona chi kimongesa jokbaenga aro chingna chirangko ringna gita man·ja. Chirangko chirangonikosa maming chekani gri ra·baengani a·sel indakgipa obostarangko chagrongna nangenga,” ine Dokongsi songni sordar parakataha.
