SHILLONG/TURA: A·songni chang 77-gipa Republic Day-ko Sombar salo, a·dokni dingtang dingtang biaprango, dingtang dingtang program-rangko ong·ate maniangtokaha.
Shillong songjinmao a·songni chang 77-gipa Republic Day-ko Polo Ground-o maniangaha aro ia salko manianio a·dokni Governor CH Vijayashankar, a·songni nisanko badalate on·angaha. Ia manianio dingtang dingtang sipai dolrang, NCC-rang aro Scout-Guide-rangni march past ka·anikoba a·dokni Governor salam ka·angaha.
Ia salko manianio a·dokni Governor, jinmana aganprakangengon, COVID-19 sajinmani ja·man, batanggimin bilsi gittamni gisepo Meghalaya a·dokni dal·roroani 10 percent ong·aha aro ia 2025 bilsini gisepo GSDP-ni tang·doani 9.66 percent ong·e, Meghalaya a·dokba, a·songo ta·rakbatsrange dal·roroenggipa a·dokrangoni damsa ong·aha ine parakataha.
Ma·mong sorkarini Viksit Bharat-na niksamsoanio pangchake Meghalaya a·dok, 2032 bilsini gisepo economy-ko changgittam tang·doatna re·mikkangengaha ineba ua aganaha.
Batanggimin bilsisani gisepo a·doko tom·tomanirangko nikna man·aha ine janapatengon, Assam-Meghalaya aro Indo-Bangla simarango sipai dolrang, bilaken nirok sandianirangko dakaha ine Governor aganaha.
Meghalaya sorkarini kamrangko janapangengon, Meghalaya Right to Public Service Act, Meghalaya One aro CM Connect gita dakgipa program-rangchi, manderangni neng·nikanirangko bang·en namatna man·aha ine Governor aganaha.
Rama jal·langrangni namroro silroroengani gimin janapangskaengon, songadam nokadamrango km 3,500 ramarangko tariaha, state road project-rangna crore 2,200 tangkarangko chamataha, sildoreng gita songre songgabataniko nambatatna kamrangko ka·chakataha aro Shillong-Silchar Greenfield Corridor-ko man·chape, mongsonggipa ramarangko tarina kamrangko a·bachengataha ine Governor parakataha.
Sanna banani, lekka porani, IT, tourism aro re·baenggipa 2027 bilsio a·doko sokachakna sienggipa chang 39-gipa National Games-ko man·chape a·doko kal·susaanirango tang·doenganikoba ia tom·anio Governor janapangaha.
Ia salko manianio, U Tirot Sing Award-ko Dr Kynpham Sing Nongkynrih-na, Pa Togan N Sangma Award-ko Father Benoy Joseph-na aro U Kiang Nangbah Award-ko Riiolang Dhar-na Governor-ni jakchi on·angaha.
Sohra-o tanggipa bol ja·dilni jal·langrangko taridilgipa Hally War-naba ia tom·anio Governor-ni jakchi Padma Shri Award-ko on·angaha.
Unbaksana kamtangko name chu·sokatanina a·dokni DIG Jubi Gabil Momin-na President’s Medal-ko aro Commandant Bashanborlang J Laloo baksana Sub Inspector Babu Chow Sinha-na Police Medal-rangko ia manianio parakataha.
Apsan daken, a·songni chang 77-gipa Republic Day-ko Tura-oba New Tura-ni Matchakolgre LP School kal·chakramo maniangaha aro ia salko manianio, Meghalaya Legislative Assembly-ni Speaker Thomas A Sangma, mongsonggipa sokgipa ong·e bak ra·angenba, a·songni nisanko badalate on·angaha.
Ia salko Tura-o manianio Assembly Speaker, jinmana aganprakangengon, ia chang 77-gipa Republic Day-ni namgipa skaniko jinmana on·angenba, ia salara a·songni Vande Mataram gitni bilsi 150 gapani baksaba apsan ong·aha ine parakataha.
A·songni jakgitelanina krengdilanggipa pagitcham ma·gitchamrang, jekai Mahatma Gandhi, Jawaharlal Nehru, Dr. B.R. Ambedkar, Sardar Vallabhbhai Patel aro Netaji Subhash Chandra Bose-na mande ra·pilskaaniko on·angengon, a·dokni matgrikrang, chong·motan U Tirot Sing, U Kiang Nangbah aro Pa Togan Nengminja Sangma-koba ua gisik ra·angaha.
A·dokna tom·tomaniko aro chel·chakaniko on·engani gimin Sangma, dingtangmancha sipai dolrangkoba ia salo mittelpilangaha.
Tura-o ia salko maniani bak gita dingtang dingtang sipai dolrang, NCC dolrang aro Scout & Guide-rang march past-koba ka·angaha aro march past ka·susaanio skanggipa boksisko Don Bosco College NCC Boys, gnigipa boksisko Don Bosco College NCC Girls aro gittamgipa boksisko Tura Government College NCC Girls cheangskaaha.
Tableau mesoksusaanio skanggipa boksisko Tura Municipal Board aro gnigipa boksisko Meghalaya Tourism department man·angskaaha.
Ia salko manianio, dingtang dingtang kamrangchi a·dokna aro songsalna on·gilgipa manderangnaba dingtang dingtang award-rangko on·angaha.
Tura-o a·songni chang 77-gipa Republic Day-ko maniani bak gita bi·sarangna kal·susaani, Inter Mahari Tug of War ba Maharirangni budu salgrikani, Cultural program aro gipin program-rangkoba ong·atangaha.
Dalu Civil Sub-Division-o a·songni chang 77-gipa Republic Day-ko Salmanpara-ni MLA Ian Botham K Sangma manidilangskaaha aro a·songni nisanko badalate on·angaha.
North Garo Hills a·jaoba a·songni chang 77-gipa Republic Day-ko Resubelpara-o maniangaha aro ia salko manianio, a·dokni PHE Minister Marcuise N Marak, mongsonggipa sokgipa ong·e, a·songni nisanko badalate on·angaha. Ia manianio, Kharkutta-ni MLA aro MNREDA-ni Chairman Rupert Momin-ba dongpae bak ra·angaha.
Resubelpara-o a·songni Republic Day-ko manianio dol 11 parade kal·gipa dolrang bak ra·angaha aro ia dolrangko North Garo Hills a·jani Deputy SP Wallamsuk S Laloo, parade commander ong·e aro SI Sengwat R Marak, second parade commander ong·e dilangaha.
March past ka·susaanio Mendipathar College-ni NCC dol, Best Parade Contingent-ni boksisko man·aha. Tableau mesoksusaanio, North Garo Hills District Rural Development Agency (DRDA) nambatgipani boksisko man·skaaha.
Ia salko manianio, dingtang dingtang kamrangchi a·dokna aro songsalna on·gilgipa manderangnaba dingtang dingtang award-rangko on·angaha.
North Garo Hills a·jao ia chang 77-gipa Republic Day-ko maniani bak gita dingtang dingtang program-rangko ong·atangaha.
Indake ong·engon, a·songni chang 77-gipa Republic Day-ko West Garo Hills a·jani Dadenggre, Raksamgre aro Jengjal Civil Sub-Division-rangoba maniangaha.
Dadenggre-o Meghalaya Assembly-ni Deputy Speaker Limison D Sangma, mongsonggipa sokgipa ong·e a·songni nisanko badalate on·angaha aro ia salko manianio, Dadenggre MLA Rupa M Marak, Dadenggre-ni Civil SDO Richa Kulkarni, dingtang dingtang official-rang, chatro chatrirang aro gipinrangba bak ra·angtokaha.
Apsan daken, a·songni chang 77-gipa Republic Day-ko South West Garo Hills a·jaoba Ampati Students Field baksana a·jani pilak dambri C&RD Block-rangon maniangaha.
Ampati-o ia salko manianio, a·dokni Health Minister Wailadmiki Shylla, mongsonggipa sokgipa ong·e bak ra·angenba, a·songni nisanko badalate on·angaha.
Ia salko manianio dingtang dingtang program-rang, jekai cultural program, bi·sarangni kal·susaani aro gipin program-rangkoba ong·atangaha. Ia salko maniani bak gita Ampati Civil Hospital-o sae dongenggipa manderangna, dilgiparang aro official-rang, cha·anirangkoba suale on·angaha.
Ia salko manianio Ampati-ni MLA Miani D Shira, Boldamgre MDC Stevie M Marak, Betasing MDC Sanjay Koch aro dingtang dingtang official-rangba dongpae bak ra·angtokaha.
Zikzak C&RD Block-o Mahendraganj-ni MLA Sanjay A Sangma, mongsonggipa sokgipa ong·e bak ra·angskaaha aro a·songni nisanko badalate on·angaha. Ia salko manianio ua, Mahendraganj-ni Jama Masjid Committee-na ambulance-koba pakwate on·angaha.
