Ia bilsini budget-ko Feb 20 tariko parakgen
SHILLONG: Ia bilsini Budget Session-ko re·baenggipa February 16 tarikoni a·bachengatgen aro February 27 tariko matchotatgen ine Mongolbar salo, Meghalaya Legislative Assembly-ni Speaker Thomas A Sangma parakataha.
Mongolbar salo, Business Advisory Committee (BAC)-ni tom·aniko ong·atani ja·man kobor ra·timgipa manderang baksa agangrikengon, Budget Session-na sal 10-ko tik ka·manaha aro ia sal 10-oni salsnikode sorkarini kamrangna aro salgittamkode private membor-rangni kamrangna tik ka·manaha ine Sangma parakataha.
Budget Session-na tik ka·gimin calendar-ko Business Advisory Committee-ba ra·chakmanaha ine u·iatengon, ia bilsini state budget-ko February-ni 20 tariko, a·dokni Chief Minister, Assembly-na parakatgen ine Speaker aganaha.
Assembly-ni chanchirimanirango pilak membor-rangan bak ra·pana man·na gita somoirangko nangdapgenchimode nangani kri somoirangko ra·dodapgen ineba Speaker parakataha.
Dingtang dingtang grant-rangna Supplementary Demand-rangko niangani salo, Assembly Session-ko attamni 3:00 bajiona ra·dodapgen ineba ua parakataha.
Business Advisory Committee-ni tom·anio a·dokni Deputy Chief Minister aro Parliamentary Affairs Minister Prestone Tynsong-ba dongpae bak ra·angaha. Opposition dolni dilgipa Mukul Sangma aro BAC-ni Member Paul Lyngdoh, video conference gita bak ra·angskaaha.
