SHILLONG: Garo Hills Autonomous District Council (GHADC)-ni term ba somoiko ra·dodapna gita Meghalaya Sorkari maming chanchiani dongjaha aro donsogimin somoi gitan election-ni kamrangko matchotatgen ine Deputy Chief Minister Prestone Tynsong Mongolbaro aganaha.
GHADC-ni term ba somoi re·baenggipa April 18 tariko matchotenga, unigimin ua somoina skangan Sorkari election-ni pilak kamrangko ka·e matchotatna nangao ga·akenga ineba Tynsong, jean District Council Affairs (DCA) Department-koba jako ra·engachim, ua Mongolbaro koborni manderangna aganaha.
“GHADC election-ko dontongani maming katta dongja. Council-ni term re·baenggipa April 18 tarikon bon·engani gimin somoina skangan pilak kamrangko matchotatna nanggen,” Deputy Chief Minister aganaha.
Indake ong·engon, GHADC election-ko ong·atani bidingo Cabinet-o chanchijokode ru·utgijan koborrangko man·aignok, Cabinet-o chanchiaha ong·ode uko jinmanaba parakaignok ine Deupty chief minister aganaha.
Garo Hills-o Special Intensive Revision (SIR)-ko dakani bidingo sing·anina aganchakengon, ia kamrang Election Commission of India (ECI)-ni bilosa ong·a. ECI-ni ge·etaniko man·osa sorkari ua kamrangko ka·na man·a ine Tynsong aganchakaha.
‘‘Election Commission of India-oni u·iataniko man·osa uko dakatna man·gen. Unigisepon Garo Hills-o SIR-ko dakna de·e mesokaniara ra·chakna man·gipa kaman ong·a, aro ian election-ni kamrangko bilakbatatgen’’ Deputy CM aganaha.
