TURA: A·chik a·songo non-tribal ba rurirangni nappruprue bading-chiwalenganiko champengna gita sima ario Bajar kulina ine adita salna skang Garo Hills Autonomous District Council (GHADC), dingtang dingtang civil society organization-rang baksa tom·e chanchirimaniko dakangaha, indake GHADC-ni, sima ario Bajar kulina chanchianiko Garo Students Union (GSU)-ba namnikpaaha.
GSU (CEC, Hq Tura)-ni President Tengsak G Momin-ni parakani gitade Garo Hills-ona niamgri sima ari gita nappruprue dongenggiparangko batanggimin adita bilsirangonin chingni gita sandie rim·e watatpilronga indake ong·genchimoba Bangladesh-chipakni authority-rangan chingni mande ba Bangladesh-oni mande ong·ja ine jechake watatpilrongaia. Uandake uamangni niamgri napdrabaenganiko sandianio chu·sokgipa ong·na man·chipja. Indake ong·genchimoba uamangni niamgri Garo Hills-o napdraenganiko champengna sorkari dakmanchaode man·genchim, maina GHADC aro a·dok sorkariko chalaienggipa apsan party-anchim ineba ua aganaha.
Sima ario Bajardamko kulianichi Bangladesh sima ari gita niamgri napruraenganiko champengna aditan dakchakani ong·gnok, unbaksa Garo Hills-ni manderangna janggi tanganina dake cha·na cholba ong·gnok, mongsongbate chadamberangna joltango bading-chiwale cha·na didiani gita ong·gen ine nikatgenba, GHADC-ni iandakgipa chong·motgipa chanchianiko a·bachengatna civil society organization-rangko okame chanchirimanina an·tangni namnikpaaniko Union dilgipa parakangaha.
Bajarko kulina a·ani bidingo aganangskaengon, da·alo ia sima ario Bajardamko a·bachengatna biapkode dal·kalako sandina nangnaba gnang, indiba iako a·bachengatna sikbebea ong·ode chona a·aoba a·bachengna man·gen ineba Momin aganangaha.
