Assam-oniko ra·baenggipa na·tokrangara cha·na nama ine sorkari talata

SHILLONG: Assam a·dokoniko Meghalaya a·dokona ra·baenggipa na·tokrangko laboratory-rango porikka ra·e niani ja·man, ia na·tokrangara mandena cha·na namgipa aro palna sim·na man·gipa ong·a ine Sombar salo, Meghalaya a·dokni Commissionerate of Food Safety, talataniko on·angaha.
Guwahati songjinmani bazaar antirango palgipa na·tokrang, mandena kenchakna nanganirang donga ine adita salrangna skang, ‘Down to Earth’ web portal-o aro social media-rango parakanichi manderangni gisepo kenchakanirang ong·katahani gimin a·dokni Commissionerate of Food Safety-oni ia talataniko on·angaha.
Iani bidingo kobor ra·timgipa manderang baksa agangrikengon, Assam-oniko ra·bagipa mang 45 na·tokrangko, Meghalaya a·dokni dingtang dingtang a·jarangoniko ra·chimonge Kolkata-o donggipa Edward Food Research & Analysis Centre Limited-ona porikka ra·e nina watataha aro Sonibar salo test report-rangko man·soani gitade, ia na·tokrangara, Food Safety and Standards Authority of India (FSSAI)-ni dongimin niamrang gitan ong·aia aro maming ong·gija chinrangko man·jaha ine nikna man·aha ine Enforcement, Health & Family Welfare Department-ni Deputy Commissioner (Food Safety) DBS Mukhim parakataha.
Na·tokrangko FSSAI-ni dongimin niamrango pangchaken, dingtang dingtang a·jarangoniko ra·chimongaha ine janapatengon, gipin biaprango porikka ra·e nian baksana ‘Food Safety on Wheels’ program-ni ning·o, department-ni gita nirokjringenga ine Mukhim parakataha.
Porikka ra·e nianio man·gipa result-rangko Assam-ni food safety official-rangnaba watatgen aro manderangni kenchakanirangko namatna gita apsan tom·e chanchirimanirangko ong·atanggen ineba ua aganaha.
Deputy Commissioner (Food Safety)-ni aganani gitade, na·tokrangko porikka ra·e nion formalin samrangko man·jahani gimin a·doko palenggipa na·tokrangara mande cha·na gita namgipa ong·aia. Indake ong·genchimoba, cha·anirangko naljokgipa ong·atna gita uni department, samba jolrango donggipa a·dokrang baksa agangrikjringenga ine Mukhim parakataha.
Niamrangko ja·rikchina gita u·iatengon, na·tok pale cha·enggipa manderang pilakkon Commissionerate of Food Safety-o register ka·china Mukhim didiatenba, licence gri cha·ani bosturangko palanide niamni a·palo ong·a ine mikrakataniko on·angaha.