SHILLONG: 2026-2027 bilsini State Budget-ko bon·kame tik ka·na skang Budbar salo, a·dokni Chief Minister Conrad K Sangma, Union Finance Minister Nirmala Sitharaman-ko New Delhi-o gronge agangrikangaha.
Iani bidingo social media-o u·iatengon, a·dokni dingtang dingtang nanganirangna tangka paisarangko chamani bidingo Union Finance Minister baksa chanchirimaha ine Chief Minister parakataha.
Meghalaya a·dokna pilak nanga dakchakanirangko on·engani giminba ua Union Finance Minister-ko mittelpilangjolaha.
Skugipa bilsina joljol Union Budget-ko ra·bae on·ahani gimin Union Finance Minister-ko mittele janapatengon, Finance Ministry-o uni dilani aro Meghalaya a·dokni namroro silroroanina uni gisiko nange mesokani giminba Chief Minister mittelpilangaha.
Meghalaya Legislative Assembly-ni Budget Session-ko re·baenggipa February 16 tarikoni February 17 tarikona ong·atna siengon, a·dokni Budget-ko February-ni 20 tariko a·dokni Chief Minister, mesoke on·angna sienga.
Ia sal 10-na ong·atenggipa Budget Session-ni salgittamkode private membor-rangni kamna aro bangki salsnikode sorkarini kamrangna tik ka·e donsomanaha.
Budbar salo a·songni skotong New Delhi songjinmaona re·anganio a·dokni Chief Minister Conrad K Sangma, Minority Affairs aro Parliamentary Affairs-ni Union Minister Kiren Rijiju-koba grongaha indiba ia tom·anio chanchirimanirangkode ua parakjaha.
