TURA: Supreme Court-ni on·gimin niamrangko pe·e, South Garo Hills a·jao donggipa Nongalbibra joloniko nangchongmotgipa lekkarang gri koela salenga ine Rongmil jolo donggipa dingtang dingtang dolrang, chong·motan ASPF, AHAM aro GOERA dolrang, Rongmil Outpost-ni Officer-in-Charge-na FIR ka·doangaha.
NGO-rangni FIR-o parakani gitade, Nongalbibra jolni koelarangko salantian truck-ni truck garirango, nangana bate gatenba, NH-62 aro NH-217 rama gita salruraenga ine truck driver-rangoni saksa uamangna parake on·aha.
Indake ong·engon, ia koela salenggipa manderang aro truck driver-rangni kosako FIR-ko segatchina, niam gri koela salenggipa pilak garirangkon rim·china aro iani bidingo ning·tue sandirokenba, niam gri koela salanio jak donggipa pilak manderangni kosako niam gita ja·kurangko de·china Rongmil-ni NGO-rang didiataha.
