TURA: Re·anggipa January jani 9 tariko, Rajabala jolo donggipa Goalgaon songo, Dilseng M Sangma-ko so·ote galanina police-rang, Sukrobar salo mande saksako rim·dapna man·aha aro ia a·selna rim·ako man·giparang da·o gimik sak 10 gapengaha.
Police-rangni u·iatani gitade, Sukrobar salo rim·ako man·gipa mandeara bilsi 47 ong·gipa Amir Hussain ong·a aro police-rang, uko Assam police-rangni dakchakanichi, Assam South Salmara a·jani Sukchar police station-ni ning·o donggipa Magurmari bazar-oniko rim·na man·aha.
Iana skang, re·anggipa Mongolbar walosan Rajabala-ni police-rang, ia a·selni bidingo bilsi 26 ong·gipa Anisul Sheikh-koba Bhaitbari songoniko rim·na man·ahachim.
“Dilseng M Sangma-ko so·otanina Rajabala-ni police-rang, mande sakgniko rim·dapna man·aha. Rim·ako man·gipa manderang, batanggimin adita salrangna police-rangoni kate dongengachim indiba ia manderangko police-rang rim·na man·aha,” ine West Garo Hills a·jani Superintendent of Police (SP) Abraham T Sangma parakataha.
Iana skangba police-rang, ia a·selni bidingo sakchet manderangko rim·na man·aha aro rim·ako man·gipa manderangni bimingranga, bilsi 30 ong·gipa Anarul Islam, bilsi 47 ong·gipa Rafiqul Islam, bilsi 40 ong·gipa Atowar Hussain, bilsi 30 ong·gipa Ariful Islam, bilsi 21 ong·gipa Ashadur Sheikh, bilsi 22 ong·gipa Mozidur Hussain, bilsi 33 ong·gipa Mofidur Hussain aro bilsi 22 ong·gipa Mozahidur Rahman ong·a.
Re·anggipa January-ni 9 tarik salpaksakchibara, Rajabala jolo niam gri chalaienggipa ro·ong quarry-ko chipatna re·ange re·bapilengmiting somoio ACHIK dolni membor-rangko Goalgaon songo, dolsa manderang champengsoenba, ro·ong, rua, jompol aro uandakgipa silchidarerangchi chadrapsoaha aro ia manderangni chadrapanichi, ACHIK membor-rangoni saksa Dilseng M Sangma, rasong gribee so·otako man·na nangahachim.
Rajabala jolo mande so·otanina saksako rim·daptaia, sak 10 gapaha
Date:
Share post:
