SHILLONG: Adita salrangna skang, East Jaintia Hills a·jani Thangsko jolo donggipa koela a·damo gopretanichi bang·a manderangan sina nangahani gimin sianggipa manderangna mande ra·pilskaani chin gita sorkarini tik ka·sogimin pilak program-rangkon dontongatchina a·dok sorkariko didiataha.
Ia a·selni bidingo an·tangni suk ong·gijaniko parakatengon, East Jaintia Hills a·jani koela a·kolo a·sel ong·e sianggiparangna mande ra·ani chin gita sorkarini pilak program-rangkon da·o dikdiksana dontongchengna nanga ine gitcham MLA PT Sawkmie aganaha.
Ia a·sel ong·aniko namen kenbegnigipa aro ong·nanggijagipa a·sel ine janapatengon, ia a·sel ong·anio sianggipa manderangni nokdangrangna ua an·tangni kalimpaaniko parakataha.
Ia a·sel ong·aniara namen aiao inmanani ong·aha ine janapatskaengon, a·sel ong·chakgipa biaponiko sak 20-na baten manggisirangko man·aha aro ia biapo manggisirang dongkuengnaba gnang ine police-rang chanchichipkuenga ine Sawkmie parakataha.
Ia a·selo sianggipa manderangni nokdangrangna aro sianggipa manderang baksa nangchapgipa pilaknan ua an·tangni kalimpaaniko parakataha.
A·doko niam gri koela bikotaniko chu·gimik champengatsrangna man·na gita nambatgipa cholko sandichina ua a·dok aro ma·mong sorkarirangkoba didiataha.
Re·anggipa Bristibar pringo, East Jaintia Hills a·jani Thangsko jolo donggipa koela a·damo rang·san gopretanichi bang·a manderangan sina aro saknaanirangko man·na nangahachim. Sonibar salona kingkingde a·sel ong·anio sigiparang sak 27 gapaha.
Koela a·kolo sianggiparangna mande ra·ani chin gita sorkari program-rangko dontongchina didia
Date:
Share post:
