A·doko niam gri koela bikotaniko champengna rakgipa ja·kurangko de·enga: Dy CM

SHILLONG: Meghalaya a·doko niam gri koela bikotaniko champengna gita a·dok sorkari, rakgipa ja·kurangko de·enga ine Sombar salo, a·dokni Deputy Chief Minister aro Home Minister Prestone Tynsong, ku·rachakaniko on·ataha.
“Niam gri koela bikotaniko ta·raken champengatchina gita chinga district administration-na ge·etaniko on·manaha,” ine Tynsong, kobor ra·timgiparangna aganaha.
Je biaprangon a·sel ong·aha, uandakgipa a·selrangna sorkari nanga gita ja·kurangko de·aha ine janapatengon, “Chinga man·a dipetde niam gri kam ka·anirangko champengna jotton ka·enga indiba rasong gribee, ia a·sel ong·taiaha. Ia biapara, mongsonggipa ramaoni, konta gittam ba konta brirang, re·na nanggipa rama ong·ani gimin ia biapara namen diltua aro ga·nangja ine an·ching nikatna man·a. Police-rangba, iandakgipa biaprangko nirok sandianio namen neng·nikanirangko chagrongna nanga. Indiba ia a·sel ong·ani ja·man chinga niam gri koela bikotaniko champengna kamrangko bilakbatataha,” ine Tynsong aganaha.
Ia a·selni bidingo a·dok sorkari, sal 10-ni gisepo High Court-o affidavit-rangko ka·gen ineba ua aganaha indiba ia a·selko da·o High Court jako ra·ahani gimin ua talbate aganna jechakaha.
“High Court-ni gita nangani kri ja·kurangko de·china,” ine ua aganaha.
East Jaintia Hills a·jani koela a·dam gopretanichi sak 27 manderang sina nangahani gimin da·o dipet sakgni manderangko rim·na man·aha ineba Deputy Chief Minister aganaha.
“Da·o a·ran karini somoio niam gri koela bikotaniko champengna chinga niam gri koela bikotenggipa manderangko sandie rim·angkugen,” ineba Tynsong, ku·rachakaniko on·angaha.
Tynsong-ni parakatani gitade, ia a·selni bidingo da·o dipet mande sakgniko rim·aha aro police-rang, gipinrangkoba rim·na sandikuenga.
Meghalaya Police-o sipairang chu·ongjaengani gimin niam gri chalaienggipa koela a·damrangko nirokna sorkari, ma·mongni sipai dolrangkoba ra·bagenma ine sing·anina aganchakaniko on·angskaengon, da·o dipet sorkari, je sipairang donga, ukon kamna jakkalengkua aro police department-o sak 3000 sipairangko bakan gapatna siengaha ine a·dokni Home Minister parakataha.
A·doko dam 22,000-na baten galchipgimin koela a·damrang dongani gimin ia koela a·damrangko chipatna gita sorkari somoiko donengama ine sing·on, “Somoi donnani kattade nakatja maina niam gri dakgipa manderangde je somoioba niam gri kamrangko ka·angkuaigen indiba chinga niam gri koela bikotaniko champengna rakbate ja·kurangko de·engaha,” ine Tynsong aganaha.