TURA: All Meghalaya Minority Students Union (AMMSU)-ni president Nur Islam aro vice president Soyudur Islam, ong·gija kamrango jak dongpagiparang ong·a ine matnangenba, AMMSU-ni membor-rang, ia dilgipa sakgniko ra·galchina dabiangtokaha.
“Union-ni president aro vice president sakgnian ong·gija kamrangko ka·anio jak donggiparang ong·a aro uamangni kosako mokordomakoba ka·aha,” ine AMMSU-ni treasurer parakataha.
Membor-rangni parakatani gitade, Nur Islam-ni kosako Rajabala Police Station-o mokordoma ka·aha aro Soyudur Islam-ni kosako Tura Women’s Police Station-o mokordoma ka·skaaha.
“President aro vice president-ni ong·gija dakgipa kamrango jak dongani a·selan NGO-ko chalaianio nangchakeanirangko ra·baaha. Uamangni ia kamko jako ra·kuaniara manderangni kosako chakatani gita ong·enga aro ian NGO-ni niamrangko pe·aniba ong·enga,” ine AMMSU-ni membor-rang parakataha.
Sorkario register ka·gimin NGO ong·e, ong·gija kamrangna mokordoma ka·a man·gipa manderangde dilgipani kamko jako ra·na kraja maina NGO-ko chalaianio, manderangni aro sorkarini tangka paisarangko hisap on·na nanga ineba union-ni membor-rang parakataha.
AMMSU-ni president aro vice president-ni bidingo ta·raken inquiry-ko dakenba kamoniko ra·galchina gitaba membor-rang, official-rangko didiataha.
