TURA: 3f category-ni ning·o sorkari skulrango Assistant Lecturer ong·e kam ka·enggiparangna re·anggipa 2025 bilsini October ja intalan dormaharangko on·kujaenga ine u·iataha.
Dormaharangko October jaonin on·chipkujaenga ine an·tangtangni suk ong·gijaniko parakatengon, an·tangtangni dormaharangko man·chipkujaengani gimin uamang Directorate of School Education & Literacy (DSEL)-ona re·ange changni chang sing·sandiahachim ine skigiparang janapataha.
Indake ong·genchimoba, office-o kam ka·gipa manderang, chutti ra·ani a·sel, ia 3f lecturer-rangni dormaharangko tarina man·kujaenga inesa DSEL-oni uamangna u·iataha ine skigiparang parakataha.
Skigiparangoni bang·batan an·tangtangni nokdangrangko chalaipaenggiparangsa ong·e, dedrangni skul fee, ki·taprang, uniform-rang aro dingtang dingtang nanga korosrangko ka·na nanga ine janapatengon, October jaonin dormaharangko man·kujaengani a·sel skigiparang, nokdangko chalaianio neng·nikanirangko chagrongna nangtokengaha ine 3f lecturer-rang parakataha.
A·doko lekka porani gadangko namdapatna skigiparangoniko ka·dongengon, skigiparangni namgninade sorkari chanchiskajaenga ineba lecturer-rang, suk ong·gijaniko parakataha.
An·tangtangni man·na nangkuenggipa dormaharangko ta·raken on·china sorkari aro nangchakegipa official-rangko didiatengon, skigiparangni namgnina aro a·dokni lekka porako namdapatna gita DSEL-o kam ka·ani bewalko namdapatchina 3f lecturer-rang mol·molataha.
