Tura: Social activist Nilbath Ch Marak, adita salrang skangmangmangsan saksa constable-ni siani mamlako jekon (accident) a·sel ong·a ine aganahachim, ua mamlako am·sanditaichina dabiaha.
Activist Marak, sianggipa nokdangni manderangko grongaha, nokdangni manderang siani mamlako ong·telaigipa a·selchi siaha ine bebera·na amjaenga, uni gimin mamlako am·sanditaichina dabienga.
Sianggipa Dikesh G Momin, West Garo Hills Rongram PS-ni ning·o ga·akgipa Tebrongpara-oni ong·achim, ua Goeragre (WGH) 2nd MLP Battalion headquater-o cook ong·e kamko ka·achim.
Sianggipani jonggipani FIR segatani gita, ia bilsini January 2 tariko Dikesh sagini jikgipa uni accident ba a·sel ong·e siani koborko on·ataha aro manggisiko jikgipani song Assam Daranggri-ona ra·angaha.
“Indake kobor man·soa jolan sianggipani jonggipa aro mahari-ma·drang Daranggri-ona sokangtokaha aro siani bidingo jikgipao sing·aon, ‘Dikesh-ni saani koborko saksa staff-oniko man·soe gari saltimgipako rimchape Goeragre-ona re·ange rimbamiting somoio WGH Jengjal PS-ni rama jolo siaha’ ine aganaha.
Indiba Dikesh-ni mahari-ma·drang, jikgipani aganako bebera·na amjaenga, maina Dikesh -ni manggisio adita saknaa man·ani chinrang dongachim. Mikkang, nachil-o doka satani chirangko nika baksana skoo janggilo maiba rakgipa bostuchi doka gita chin donga. Iana nokdangni manderang Rongjul PS-ni Officer in-charge-na u·iatahaon OC, sianggipani jikgipa aro driver-ko sing·sandiaha aro manggisiko post mortem ka·na gita Goalpara Civil Hospital-ona watataha, ine FIR-o janapaha.
January 4 tariko mamlao jak donggiparangko sandie sasti on·china dabie FIR-ko segataha.
Indake ia mamlao WGH-ni superintendent of Police Abraham T Sangma-o sing·ataon, Sianggipa 2nd MLP BN-o cook-ni kamko ka·achi aro epilepsy saa donga baksana chu ringrakgipa onga·chim ine aganaha.
