Tura-ni Nokma Council-o Indigenous People’s Rights-ni bidingo workshop-ko ong·ata

TURA:  West Garo Hills a·jani Tura, Nokma Council-o, Grassroot Organization H.Q. Shillong-ni gita skanggipa changna  ‘Indigenous People’s Rights’-ni bidingo Sonibar salo salsana workshop-ko ong·ataha. Program-o, Meghalaya Arts and Cultural-ni gitcham Director C.T. Sangma (Meghalaya Civil Service Officer) mongsonggipa sokgipa ong·e bakko ra·angan baksana Grassroot Organisation, Shillong-ni  Kennyson Lyngdoh, Tura-ni Advocate Disem D. Shira, Monitoring Committee Tura-ni Member of District Development Co-ordinator, Roger Beni A Sangma, una agreba  Dr. Merril N. Sangma program-o mongsonggipa ong·e dilangaha.
Arts and Cultural-ni gitcham Director C. T. Sangma jinmana aganprakataon A·chik a·songko ma·ambirangni dilbaani, A·chik jatrangni janggi tangbaani, Nokma-rangni ong·bachengani aro Indian Constitution-o man·gimin bilrangni bidingo talatangaha. Uni gisepon songsalo janggi tangani gadangrang dingtanggipa ong·rorobaengon, chasongni chasongrangona man·baenggipa A·chik jatrangni niam retirangko ja·rikenganiba komiroroengaha ine janapatengon, “da·alo an·chingni gisepo gipin jatrangni daka rikanirang, ku-agananirang aro gipinrang baksa brine janggi tangenganiko nikna man·nengon, mikkangchi iako dakangkuaiode an·ching jatkon gimaatani ong·gnok,” ine ua aganaha.
Indake jatni dakbewalrangna ripingchina didiange Nokma-rangna on·gimin bilrangko u·ie-ma·sie ra·china aro uarangko ja·rikchina agan-ku·pattiaha. Indake Sixth Schedule-ni bidingo aganangskae, District  Council-ko Garo Hills-o man·chengaoni  bilsi 70 rangna batengahaon, council-o ong·a obostarangko niatgenchimode ian on·gimin bilrangko name jakkaljani ba jakkalsretani a·sel ong·a  ineba ua parakataha.