TURA: South Garo Hills a·jaoniko koela salruragipa truck garirang, dongimin niamna bate koelarangko, National Highway-217 (gitcham NH-62) rama gita salruraenga ine Garo Students Union (GSU) Mangsang regional unit, East Garo Hills a·jani Deputy Commissioner-na badi ka·doatenba, iani bidingo magisterial inquiry-ko dakatchina didiataha.
Iani bidingo East Garo Hills a·jani Deputy Commissioner-na badi ka·e sedoatengon, chaka ge·dok donggipa truck garirangna dongimin niamde metric ton 12-sanchim indiba ia truck garirang, Supreme Court-ni dongimin niamko manigija metric 25-oni 30-mang ong·pile koelarangko salenga ine GSU Mangsang regional unit parakataha.
“Ia truck garirang, metric ton 25-oni 30-mang ong·pile koelarangko salengani a·sel gital tarienggipa ramarang nosto ong·atako man·enga aro ia garirangni ramarango a·sel ong·anikoba salantian gita nikna man·rongenga. Ian ramarangko nosto ka·asan ong·aigija manderangni janggirangnaba kenchakna nangani ong·enga,” ine GSU Mangsang regional unit-ni president Barnawel Sangma parakataha.
Ia truck garirangni nangana bate koelarangko salaniara, manderangna kenchakna nanganiko ong·atan baksana a·dokni kajina man·anikoba noksan ong·atani ong·enga ineba Sangma parakataha.
“Truck bolprako koela metric ton 12-ko salnasan DMR department, kajinako ra·e challan-ko on·engani gimin dongimin niam bate salenggipa koelarangkode MV Act 1988-o pangchake, Transport check gate-rango ra·onna nanga aro ton 12-na batgipa garirangnade niam gita sastirangko on·na nanga,” ineba GSU Mangsang regional unit dabiangaha.
