Reservation Policy-ni bidingo dingtang agangrikna didianiko AHAM jegala

TURA: Meghalaya a·dokni State Reservation Policy-ni bidingo Expert Committee-ni on·gipa report-ko Assembly-o parakatani ja·man iani bidingo MLA-rang, dingtang agangriktaina Opposition dolni dilgipa Mukul Sangma aro Voice of the People’s Party (VPP)-ni president Ardent M Basaiawmoit-ni Chief Minister-ko didiahani gimin A·chik Holistic Awakening Movement (AHAM) raken jegalataha.
Reservation Policy-ko gital dake nipiltaiani bidingo a·dokni dilgiparang, dingtang chanchirimtaiani didianiko jegalatengon, “Chief Minister-ni chamber-o an·tangtangari chanchirimtaina ku·monganiara niamni a·palo ong·enga maina sorkarini songe on·gipa Expert Committee-an, Meghalaya a·dokni dingtang dingtang biaprangona re·e, manderangni nangani aro nangnikanirangko nimanenba report-ko tarie on·manaha,” ine AHAM parakataha.
Meghalaya a·doko songdongenggipa manderang, civil society organization-rang aro dingtang dingtang dilgiparangba, Reservation Policy-ko skango gitan donaichina nangnike Expert Committee-ni mikkango parakmanaha ineba AHAM parakataha.
“Democracy-ode majority ba bang·batgipa manderangni chanchianian aro nangnikanian chu·sokna nangaia. Manderang bang·batan an·tangtangni nangnikanirangko Expert Committee-na parakmanahani gimin iako dilgiparangni gisepo chanchirimtaina miksonganiara a·songni dongimin niamo manderangni namnikaniko pe·ani ong·enga,” ine AHAM parakataha.
Garorangna kanggimin 40 percent-kode komiatgija aro batatgija, Khasi-Jaintia-rangna chamaniko 47 percent-ona bariatchina VPP MLA Ardent Basaiawmoit-ni dabianiko jegalatskaengon, “Reservation policy-kode bimang ge·sanosa chalaiani gimin badiaba bakko batatgenchimoba, ia policy-ni bimang gimikkon nipiltaiaona sokangaigen. Uni gimin Garorangna chamgiminko dangtapgija Khasi-Jaintiarangna kanganiko bariatchina dabianiara ainni gita ong·jaenga,” ine AHAM parakataha.
Reservation policy-ni baksakosan nipiltaianiara chu·gimik policy-kon nipiltaiaona ra·angge ine janapatengon, iandake ja·kuko de·anichi jatsa jatgipinni kosako ding·chaogrikani, dingtang dingtang jatrangni gisepo komibatnikani aro gital dake nipiltaichina dabianionan sokangtaigen ine AHAM parakataha.
“Manderang an·tangtangan reservation policy-ko taridapgija skango gitan donangkuchina sorkarini songe on·gipa Expert Committee-ni mikkango parakmanahaode maini gimin dilgiparang an·tangtangari iani bidingo chanchirimtaina nangkuenga?” ine AHAM sing·doatenba, Expert Committee-ni ku·pattie on·ani ja·manba sorkari, ia policy-ko taridapna jotton ka·angkua ong·ode niamko pe·a ga·akgen ine mikrakataniko on·angaha.