GHADC-o ST certificate nangtelgipa ong·ataniko champengode bilake jingjengatna NGO-rang ka·mikkenata

TURA: Garo Hills Autonomous District Council (GHADC) election-o susana gita candidate-rang, Scheduled Tribe (ST) donggipa ong·na nangtelgen ine adita salrangna skang Executive Committee (EC)-ni pass ka·aniko badiaba MDC-rang aro a·dok sorkarioniba ra·galpilna jotton ka·genchim ong·ode Garo Hills-o jat gimik bilakbee jingjengatgen ine Sombar salo, Garo Hills-ni dingtang dingtang dolrang, mikrakataniko on·angaha.
GHADC election-o susana gita candidate-rang ST certificate donggipa ong·na nangtelgen ine EC-ni pass ka·angani ja·man, adita sak MDC-rang, GHADC-ni Chief Executive Membor (CEM) aro official-rangona re·ange jegalanirangko dakangaha ine matnanganirangko knasona man·ahani gimin Sombar salo, Garo Hills-ni dingtang dingtang dolrang, GHADC office-ona re·angenba, ia mikrakataniko on·angaha.
GHADC office mikkango, Garo Hills-ni dingtang dingtang dolrang, jekai GSU, ADE, FKJGP, AWYO, FAF, CoMSO aro uandakgipa dolni dilgiparang, kobor ra·timgipa manderangna talataniko on·angengon, 2015 bilsimangonin GHADC-o gipin jatrang susana aro bak ra·pana man·jawa ine dakgrikbaenga aro iana dingtangmancha adita salrangna skangsan GHADC-ni EC, gipin jatrang susana man·jana gita ST certificate-ko nangtelgipa ong·ataha ine parakataha.
“GHADC election-o susana gita ST certificate-ko nangtelgnok ine EC-ni pass ka·angani ja·man, ruling-oni MDC sakbri, GHADC-ni CEM aro official-rangko grongenba, iako ra·galpilchina dabiaha ine chinga knasona man·aha. Uni gimin da·al salni bako chinga GHADC office-ona re·bae, iani bidingo dingtangmancha mikrakataniko on·enga. Ia gital niam ra·gatgipako ruling ba opposition MDC-rangoni jegalna jotton ka·genchimoba ba a·dok sorkarioniba ia niamko ra·galpilna jotton ka·genchimode, Garo Hills gimikon chinga bilakbee jingjengatanirangko dakanggen,” ine ADE-ni president Dalseng Bira Ch Momin mikrakataniko on·angaha.
GHADC election-o gipin jatrang susapana man·jachina dabian baksana GHADC-na dingtang electoral roll-ko tarichina, Garo Customary Law-ko pass ka·china, Service Rule aro Finance Rule-ko ra·gatchina, Finance Account Committee-ko songchina aro Digitalise ka·china gitaba dingtang dingtang dolrang dabitokenga ineba Momin parakataha.