TURA: Garo Hills Autonomous District Council (GHADC) election-o susana gita Scheduled Tribe (ST) certificate-ko nangtelgipa ong·atna tik ka·angani ja·man mitam dilgiparang, ia niamko ra·pilchina gita GHADC-ni Chief Executive Membor (CEM) Albinush Marak aro Executive Committee-ni Secretary-ko ka·mikkenatna jotton ka·enga ine A·chik State People’s Forum (ASPF) matnangataha.
ASPF-ni parakatani gitade, GHADC-ara, Indian Constitution-ni Sixth Schedule ning·o Tribal-rangko aro Tribal-rangni daka rikani, niam reti aro a·a chiako chel·chakna on·gimin bimangsa ong·a aro GHADC-ni kamrango dilgiparangko ka·mikkenataniara niamni a·palo ong·a.
“GHADC-ni ra·gatgimin niamrangko ra·pilchina ka·mikkenataniara ra·chakna man·gijanisan ong·aija indiba ian a·songni niam bidiko on·gimin bilrangko mande ra·gijaniba ong·a,” ine ASPF-ni dilgiparang parakataha.
Gisik apchone chanchiaigija, Tribal-rangna an·tangari sason ka·na man·ani bilko dal·e ra·china aro iani bidingo ning·tue chanchichina gitaba ASPG, A·chikrangko aro pilak Tribal jatrangko didiataha.
“GHADC-ni CEM, Deputy CEM ba Secretary-ko iandake ka·mikkenataniko chinga raken jegala aro uamangni kamrangko ka·anio chu·gimik chel·chakaniko on·china gitaba chinga didienga,” ine ASPF-ni dilgiparang parakatenba, GHADC election-o niam gita kam ka·aniko saoba champengna ba ka·mikkenatna jotton ka·angkua ong·ode uamang jrip nie dongaigija, niamo pangchake ja·kurangko de·anggen ine mikrakataniko on·angaha.
