PA Sangma-ni 10-gipa siani salko gisik ra·jola
RESUBELPARA: FOCUS+ scheme-ni gnigipa bakko Budbar salo, a·dokni Chief Minister Conrad K Sangma, North Garo Hills a·jani Resubelpara Mini Stadium-o program-ko ong·atanio a·bachengate on·angaha.
Ia program-ko Lok Sabha-ni gitcham Speaker PA Sangma sagini 10-gipa siani salko gisik ra·ani aro a·doko MDA sorkarini bilsichet gapaniko maniani bak gita ong·atangaha.
Ia FOCUS+ scheme-ni skanggipa bakko North Garo Hills a·jao 2022 bilsio a·bachengataha aro ia gnigipa bakni ning·o, biming segattaigipa manderangoni sak 2000-mangni gita manderang namgniko man·gen.
Ia tom·aniko ong·atanio, FOCUS+ baksana Green Meghalaya-ni ning·o namgniko man·enggipa manderangba sorkarini gita dakchakanirangko man·aha.
Ia tom·bimonganio a·dokni Chief Minister, jinmana aganprakangengon, FOCUS+ aro Green Meghalaya-ni ning·o namgniko man·enggipa manderangna an·tangni kusi ong·chakaniko parakangenba, songadam nokadamrango songdongenggipa manderangna janggi tanganio dakchakanirangko on·angkugen ine ku·rachakaniko on·angaha.
PA Sangma sagina mande ra·pilskaaniko on·angengon, uni janggi tangani aro kamrangni gimin Chief Minister, gisik ra·atpiltaianiko on·angaha.
PA Sangma sagina mande ra·pilskaani chin gita ia salni bako PA Sangma Museum-ko Tura-ni PA Sangma Stadium-o kuliaha ineba Chief Minister parakataha.
Meghalaya a·dokni economy-o dal·rorobana man·engani gimin janapangengon, da·alo Meghalaya a·dokba, Tamil Nadu a·dokni ja·man, a·songo ta·rakbatsrange dal·roroenggipa a·dokrangoni gnigipa ong·enga ine Chief Minister parakataha.
Sorkarini a·bachengatgipa dingtang dingtang program-rangara, pilakni gitan apsan ong·e dal·roroaniko ra·bana miksonganisa ong·a aro a·dokni dal·roroanio, manderangni janggi tangani gadangrangba dingtangna nanga ineba ua aganaha.
Ia tom·bimonganio a·dokni Tourism Minister Timothy D Shira-ba dongpae jinmana aganprakengon, PA Sangma sagini janggi tangani aro on·gilanirangko gisik ra·atenba, uni mingnamgipa kamrangni a·selsa Meghalaya aro salgro salaram jolrangko a·songni gipin biaprangoba ma·sipana man·aha ine parakataha.
Ia tom·bimonganio dongpae bak ra·anggipa gipin manderangara, Mendipathar MLA Marthon J Sangma, Bajengdoba MLA Pongseng Marak, Kharkutta MLA Rupert Momin, North Garo Hills a·jani Deputy Commissioner Dr Abhishek Saini aro gipinrang ong·a.
