Ampati: Chief Minister of Meghalaya, Conrad K Sangma, da·al Student’s Field Ampati-o South West Garo Hills District Administration-ni gita FOCUS+ programme aro one day cheque distribution programme-ko FOCUS+ and Green Meghalaya beneficiary-rangna ong·atgipao dongpaaha.
2022 bilsini July jao FOCUS+ programme-ko a·bachengataha, iako songadamo janggi tanganiko bilakdapatna a·dok gimikni seoka man·gipa nokdangantina bilsi prako tangka hajl 5-ko on·e dakchakaniko on·a miksonge a·bachengataha, ine Chief Minister beneficiary-rangna aganangaha. Kakket ong·gijaniko aro nokli dake mesokaniko champengna niamko donaha nokdangprakoni saksa beneficiary ong·na nanggen ine scheme-o tik ka·aha ine ua agnaha.
2022-23 bilsio sak 1,50,662 beneficiary-rang chu·gimik tangka kror 75.33-ko man·soaha ine ua u·iataha. Meghalaya One Portal baksa name dake nianiko dakani ja·man sak 93,285 beneficiary-rang man·a kragipa ine parakangaha, jemangan jegalako man·aha uamangba portal gita galangtaina man·gen.
2023-24 bilsina kam ka·aniko bilakdapatna tangka paisa on·aniko ru·utataha, uni ja·man 2025 bilsini August jao tangka 2,500-ko on·aha aro 2025 bilsini December jao tangka 2,500-ko on·aha, chu·gimikde tangka kror 46.64 ong·aha.
2024-25 bilsio, sak 93,285 beneficiary-rangna skanggipa tangka 2,500-ko sorkari watataha aro Garo Hills a·jaoni ge-11,133 gital nokdangrangko man·dapaha, FOCUS+-ni ning·o chu·gimik nokdang te-1,04,418-na sokdoaha. Da·o dipet scheme-ni ning·o tangka kror 148.08-ko jakkalaha.
Garo Hills a·jao, da·o ge-5 district-rang gimikna tangka kror 20.26-ko on·atan baksa namgnigipa man·gipa nokdang te-81,046-rango gital beneficiary sak 11,133-ko man·chapatgen. South West Garo Hills-o sak 14,017 beneficiary-rang tangka kror 3.50-ko man·sogen.
Green Meghalaya+-ko a·bachengatani bidingo Chief Minister kan·dike talatangaha, Payment for Ecosystem Services (PES) miksongani ning·o a·a hectare 10,000-oni 20,000-na on·angachi buringrangko ripingna buring nokgiparangna aro community-rangna programme-ko on·manaha.
Meghalaya a·doko buring 17,000 sq km-ni gita donga aro programme-ni ning·o laksa hectare a·ao buringko ripingna sorkari miksongenga. Da·o dipet, a·dok gimiko sak 2,800 baneficiary-rang buring a·ako hectare 40,000-ni gita ripingaha, ine ua aganaha.
Green Meghalaya+-ni ning·o chu·gimik tangka kror 77.21-ko jakkalaha, Garo Hills a·jao tangaka kror 34.73-ko man·chapataha, da·o ong·enggipa phase-o beneficiary-rangna tangka kror 48-ko chamatgen.
South West Garo Hills-o, Rerapara, Zikzak aro Betasing block-rangoni beneficiary-rangna tangka lak 48.23-ko sualatengaha, conservation-ni ning·o hectare 551.18-ko buring biaprango man·gopataha.
FOCUS+ aro Green Meghalaya dakgipa scheme-rangni ning·o tangka paisarangchi dakchakaniko community-rangko ra·dona sorkari on·kangangkuenga ine tom·anio Rangsakona-ni MLA Subir M Marak aganangaha. A·jani manderangona dakchakaniko on·enggipa tangka paisarangko sokatna sorkari neng·takpilgija kamrangko ka·enga aro ia miksonganirangko chu·sokatna jotton ka·enggipani bidingo ua talatangaha.
Tom·ani a·bachengao South West Garo Hills-ni Deputy Commissioner Anendya Raajshre, IAS rimchaksoani kattarangko uni agananio community-ni dilgiparangko, artist-rangko aro volunteer-rangni ia programme-ko chu·sokatna uamangni on·kanganina de·mittele aganangaha. Ua MLA-rangkoba rimchaksoaha aro uamangni mikkangchi dakchakaniko aro bakrimaniko on·angpakuchina didiangaha.
Programme-ni somoio beneficiary-rang an·tangtangni u·i ma·sigiminrangko agnaangaha, uamangni janggi tanganiko maidake scheme-rangko tang·doata aro samtangtango dongenggiparangko bol waarangko ripingna didia uarangni bidingo talatangaha.
Programme-o Rangsakona MLA, Subir M Marak, Salmanpara MLA, Ian Botham K Sangma, Mahendraganj MLA, Sanjay A Sangma, Nogorpara MDC, Linekar K Sangma, Boldamgre MDC, Stevie M Marak, district official-rang, community dilgiparang aro district-oni beneficiary-rang dongpaaha.
