A·kingrango niam gri songdonggiparangko a·rikgalchina gitcham MDC didia

TURA: Garo Hills-o, mongsongbate a·kawe jolrango donggipa Nokma A·kingni a·arango niam gri songdong a·chaenggipa manderang batroroengani gimin Kharkutta-ni gitcham MDC Smith Momin, suk ong·gijaniko parakataha.
“Garo Hills-ni bang·bata a·kingrangon Bangladesh-oni napsrukbagipa manderang, niam gri songdong a·chatokenga aro ian songni nokni manderangna kenchakna nanganiko ra·baenga. Ia a·kingrangara A·chikrangni niamo Nokma aro Maharirangnisa ong·a aro ia a·arangko uamangsa rakkie donenga. Nokma A·kingrangara Indian Constitution-ni Sixth Schedule aro jatni niamo chel·chakako man·giparang ong·a. Iandakgipa a·kingni a·arango niam gri songdong a·chaaniara niamkosan pe·a ong·ja indiba chengoni ja·rikbaenggipa A·chikrangni niam reti aro daka rikaniko bilgriataniba ong·a,” ine Momin parakataha.
Meghalaya a·dokkoa, Tribal-rangni nangani, jatni daka rikani aro krenganichisa bikote on·aha ine janapatengon, ian pagitcham ma·gitchamrangni on·kangani aro krenganichisa a·dokko man·aha aro Bangladesh-oni niam gri napsrukbagipa manderangni a·sel ong·ja ine gitcham MDC parakataha.
“Da·alomangna a·dokko chalaienggipa sorkariko Meghalaya a·doko songdongenggipa Tribal-rangni bakrimani aro seokanichisa songna man·aha aro Bangladesh a·songoni niam gri napsrukbagiparangchi ong·ja. Uni gimin a·dok sorkari, Tribal manderangna chakpaaniko on·e, Tribal-rangni a·a-chiarangko aro jatni bilrangko chel·chakna nanga,” ine Momin parakataha.
Assam-o niam gri songdongenggipa Bangladesh a·songni manderangko Assam sorkarini a·rikgalaniko gisik ra·atpilengon, Meghalaya a·dokoba apsan daken, Garo Hills-o, mongsongbate a·kawe jolrango niam gri songdongenggipa manderangko a·rikgalchina gita Kharkutta-ni gitcham MDC, a·dok sorkariko didiataha.