TURA: Re·anggipa Budbar salo, Tura songjinmani dingtang dingtang biaprango, so·sojengjeng ong·anganichi nangchakea man·gipa biaprangona a·dokni Chief Minister Conrad K Sangma re·ange niangaha aro ding·chaogipa manderangni nisigalgipa dokkanrang aro nokrangkoba niangaha.
Garo Hills Autonomous District Council (GHADC) election-o Tribal ong·gijagipa manderangni bak ra·aniko jegale jingjengatani re·anggipa Sombar salonin a·bachengahachim indiba obostarang Budbar salo bilongbatangahachim.
Budbar pringonin Army-rang, flag march-ko ka·e, Tura songjinma gimik re·rurae nirok sandianirangko dakangaha indiba Budbar attamchibara, jingjengatgipa manderang ka·sinsin bang·baroroe Hawakhana-o so·sojengjeng ong·anirang bilongbana a·bachengaha.
Hawakhana-o jingjengatenggipa manderang, NPP office baksana adita dokkanrangko so·aha aro uanoni Chief Minister-ni nokkoba chadrapna ine Araimile-chipakna re·jomangahachim. Indake ong·genchimoba, Araimile junction-o sipai dolrang dongsoenba, jingjengatenggipa manderangko champengsoaha aro silchidarerangchi goe adita sak manderangko saknaataha.
Iandake so·sojengjeng ong·atanio, manderangni dokkanrang aro ramarango tarie dongipa biaprang bang·en nosto ka·ako man·na nangaha.
Bristibar pringo, Tura songjinmani dingtang dingtang gittimrango songdongenggipa manderang an·tangtangan ong·katgrimenba, nosto ka·a man·gipa biaprangko jinma rongtalataha aro ia manderangko Chief Minister an·tangan gronge, uamangni namgipa kamrangna mittelpilangaha.
Dingtang dingtang gittimrangona re·ange manderangko grongeanio, mitam gittimrangode merong aro gipin nangchongmotgipa bosturangko man·jae neng·nikanirangko chagrongna nangtokenga ine gittimni manderang u·iatani ja·man, dingtang dingtang gittimni development committee-rang baksa tom·aniko ong·atenba, neng·nikanirangko man·enggipa nokdangrangko see ra·china aro uamangna ta·raken cha·ani bosturangko sokate on·china gita Chief Minister, West Garo Hills a·jani District Administration-na ge·etaniko on·angaha.
