Nongpoh: Ri-bhoi district-ni Sumer-o Sonibar saljatchio adasa ramao a·sel ong·ao nogipa siaha aro adatang jokkom ong·kala.
Sianggipa bilsi 23 ong·gipa Retina Hanse minga aro jokkom ong·gipa adatang bisli 27 ong·gipako Celestial Hanse minga, sakgnian Ri-Bhoi distict-ni Marngar biapni Khamar songo donggiparang ong·a.
Police-oniko kobor man·soani gita, adasa sakgni Sumer-oni Nongpoh-ona scooty-o songreangengachim, scooty-ni nnumber ML-05AC2751, uko adatangan salengachim.
National Highway-6, Sumer-o jeon ramako tarienggipa biapo gari number KH02BS0445 truck gari baksa chadingaha jean Nongpoh-chipakna re·angengachim. Nogipa bang·kalen jokkom ong·aha aro uni adatang bang·e jokkom ong·jaha.
Adasa jokkom ong·gipa ta·rake Umsning Community Health Centre-ona sanna bannaniko dakna rimangaha. Doctor ja·man nogipako siaha ine parakataha maina uni sko bang·e matani a·sel aro jakrani jaksku be·ani gimin siaha, ine parakataha.
A·sel ong·anio darangko botchhipani dongjani gimin sigipako post-mortem ka·jachina sigipa nokdangni manderang mol·molangaha ine police u·iataha. Mol·molaniko Ri-Bhoi district-ni Executive Magistrate Esther Ngurliengmoi Marak ra·chakaha aro dakna nangni pilak kamrangko matchotani ja·man manggisiko nokdangni manderang ra·angaha.
