‘GH-o so·sojengjeng ong·anina budeparangko rim·a dongkuja’
TURA: Batanggimin sal somoirango so·sojengjeng ong·anggipani bidingo Tura-ni ja·delgipa mande saksa aro dolsa NGO-ni memborko rim·a ine Facebook social media-o noksa baksa gipatenggipa koborko Bristibar salo, West Garo Hills a·jani police-rang jegalatenba, da·o dipet ia so·sojengjeng ong·ani bidingo police-rang, ja·delgimin manderangko rim·a dongkuja ine talataniko on·angaha.
Facebook social media-o noksa baksa seatgipa koborko jegalatengon, ian Artificial Intelligence (AI)-chi tarigipa noksasa ong·a aro tol·gipasa ong·a ine West Garo Hills a·jani Superintendent of Police (SP) parakatenba, ian Garo Hills-o so·sojengjeng ong·aniko bariatna miksonge, badiaba manderangni tol·e tarigipa noksa aro koborsan ong·aia ine talataniko on·angaha.
“Tura-ni ja·delgimin mande saksa aro NGO-ni memborko handcuff pate police-rangni rim·anggipa noksa social media-rango, mongsongbate Facebook-o watrikrikenga ine West Garo Hills a·jani Police, koborko man·soaha. Ia so·sojengjeng ong·anina da·o dipet ja·delgimin manderangoni darangkoba West Garo Hills a·jani police-rang rim·a dongkuja ine chinga talataniko on·na ska. Ia noksara AI-chi tarigipa noksasa ong·a aro tol·gipasan ong·aia. Ian Garo Hills-o so·sojengjeng ong·aniko ding·chaobatatna gita badiaba manderangni jotton ka·anisa ong·enga,” ine West Garo Hills a·jani SP parakataha.
Iandake tol·gipa koborrangko bebera·jachina aro watrikrikskajachina gita manderangko didiatengon, iandakgipa kobor ba noksarangko watna skang, kakket ong·ama ong·ja uko name sandichengchina gita West Garo Hills a·jani SP mol·molataha.
Social media-rango iandake tol·gipa koborrangko man·sogenchimode ta·raken sepangbatgipa police station, outpost, beat house ba +918837423053, +917005530510, +919089199064 nombor-rangona ka·e, Tura-ni Police Control Room-na u·iatchina gita SP didiataha.
