SHILLONG: Re·baenggipa May jao adita sak gitcham legislator-rang BJP-o napangnaba donga, maina BJP, 2028 Assembly election-na skang party-ko bilakatna jotton ka·soenga.
Kobor man·soani gita gitcham MLA- Mohendro Rapsang (mejaomangmang NPP-ona ong·katgipa), Jemino Mawthoh (UDP-o bakrime ong·akatgipa), aro Pynshngain N. Syiem (Congress-ni gitcham dilgipa)-mang May jao BJP-o napanggen.
BJP, Khasi Hills-o uamangni organisation-ko bilakatna gipin party-rangoni a·gipi dilgiparangko an·tangona salna jotton ka·enga.
Meghalaya-ni politics-ko niatgenchimode bakrime rikgipa sorkariko NPP-ni Chief Minister Conrad Sangma-chi dilenggipao UDP, BJP, aro gipin regional party-rang jekai HSPDP donga. Batanggimin bilsi 2023 assembly poll-o darang party-an majority-ko man·jae bakrime sorkariko rikaha.
BJP, sorkario bakrimgipa ong·genchimoba uamangni seat bilongen komia, uni gimin uamangni base-ko bilakatna jotton ka·enga.
Iarangni gimin kobor ra·timgiparang baksa agangrikmitingo BJP-ni MLA aro gitcham cabinet minister Alexander L. Hek, re·baenggipa salrango BJP-ona bang·en manderang napbagen ine aganaha. BJP, a·doko aro ma·mongo namgipa kamrangko ka·enga uni gimin manderang da·ode BJP-ko namniktoka ine Hek aganaha.
May jao gital dilgiparangko party-o rimchaksona chanchisoenga.
Rapsang, ia bilsini February jao NPP-oni ong·kataha. Mawthoh-ba UDP-oni ong·kataha.
BJP, ma·mongo bilakgenchimoba Meghalaya aro salgro salamramni gipin biaprango bilakna man·srangkujaenga, mongsongbate Christian-rangni a·kanggipa a·dokrango BJP, ja·manchakenga.
