SHILLONG: Meghalaya a·doko dingtang dingtang festival, concert aro uandakgipa program-rangko ong·atanio krorni kror tangkarangko koros ka·enganina a·dok sorkariko matnangtokengon, iandakgipa festival-rangko aro program-rangko sorkari, a·dokko a·gilsakni gadango niksenggipa ong·atna aro tourism-ko tang·doatnasa ong·atenga aro iandakgipa program-rangko sorkari, a·dokna noksan ong·pilede ong·atenga ong·ja indiba man·gni gnangsa ong·atenga ine a·dokni Chief Minister Conrad K Sangma parakataha.
Manderangni matnanganirangna aro jajrengchakanirangna aganchakaniko on·angengon, iandakgipa festival-rangko aro program-rangko ong·atanio sorkari, mongsonggipa kamrangna chamgimin tangka paisarangkode koros ka·enga ong·ja ine Chief Minister talataniko on·angaha.
Iandakgipa festival-rangko aro program-rangko ong·ataniara a·dokni man·dapgninan ong·atenga ine janapatengon, tangka paisarangko koros ka·anioba sorkari, pangnan hisap gnangsa korosrangko ka·enga ine Chief Minister aganaha.
“Game ge·e cha·giparang, chatro chatrirang ba an·seng baljokani kamrango noksan ong·pilede chinga iandakgipa festival-rangko ba program-rangko ong·atenga ong·ja indiba chingni kam ka·ani bewalara pangnan ari gnangsa ong·a. Ian pilakni gita namroro silroroaniko ra·bana miksongani gnang ja·ku de·anisa ong·a,” ine Sangma aganaha.
Meghalaya a·doko dingtang dingtang festival-rang, concert-rang aro program-rangko ong·atrongengani gimin batanggimin somoirango opposition Voice of the People’s Party (VPP), a·dok sorkariko matnangenba, a·dokni manderangna namgnirangko on·ani pal iandakgipa program-rangko ong·ataniosa tangka paisarangko koros ka·e roskaenga ine aganahachim.
