SHILLONG: A·doko rikenggipa LPG bottling plant-ko ta·raken matchotangengaha aro ia karkanako bakan matchotna ka·dongenga ine Budbar salo, a·dokni Chief Minister Conrad K Sangma parakataha.
Iani bidingo kobor ra·timgipa manderang baksa agangrikengon, LPG bottling plant-ko rikna a·bachengaha aro kamrangko ta·raken ka·engahani gimin ia karkanako bakan matchotna ka·dongenga ine Sangma aganaha.
“A·doko LPG bottling plant-ko skangonin kulina miksonganirang dongachim indiba gitcham sorkarirang darangba iako chu·sokatchipjaha. A·doko LPG bottling plant-ko nangtelenga ine nikenba ia sorkari a·arangko on·aha aro da·o karkanako rikna a·bachengaha. Pilak kamnan somoikode nangaia aro karkanako bakande matchotna man·ja indiba da·o kamrangko ta·raken ka·engahani gimin ia karkanako ta·raken matchotna chinga ka·dongenga,” ine Sangma aganaha.
Commercial ba dokkano jakkalgipa LPG-rang chu·ongjaengani gimin janapatskaengon, ian a·song gimikon ong·enga aro Meghalaya a·dokoba apsan daken commercial LPG cylinder-rangko chu·onga gita man·jaenga ine Sangma aganenba, domestic ba noko jakkalgipa LPG-kode Meghalaya a·doko nanga gitan man·enga aro bang·gijarangsan chu·ongjaenga ine parakataha.
“Domestic LPG cylinder-rangba adita chu·onggijanikode nikna man·enga indiba inditana ong·kujani gimin neng·nikanirangkode man·kujaenga,” ine Chief Minister aganaha.
A·songni pilak biaprangon commercial LPG cylinder-rang chu·ongjaengani gimin ma·mong sorkari, 20 percent-oniko 70 percent-ona bariataha ineba Chief Minister parakataha.
“Commercial LPG-rangko a·dokrangna ma·mong sorkari da·o 70 percent-ona bariate watengahani gimin manderang adita rang·speaniko man·engaha. Re·baenggipa salrangode an·ching commercial LPG-rangko skango gitan chu·onge man·piltaina ka·dongenga,” ine Sangma aganaha.
