TURA: South Garo Hills a·jani Gasuapara jolrango Jio mobile network-ko name man·jaengani a·sel, chatro chatrirang, bading chiwalgiparang aro dingtang dingtang kamko ka·gipa manderang neng·nikanirangko chagrongna nangtokenga ine jolo songdongenggipa manderang parakatenba, Jio network-ko nambate on·china didiataha.
Iani bidingo S Salgra G Momin minggipa mande saksa badi ka·doatengon, Gasuapara jolrango Jio company-ni official-rang, kamrangko nirok sandianirang dongjani a·sel network-ko name man·jaeng aro iani a·sel internet-ko jakkalna nanggipa chatro chatrirang, bading chiwalgiparang aro dingtang dingtang kamrangko ka·enggipa manderang neng·nikanirangko man·na nangenga ine parakataha.
“Gasuapara jolo Jio company-ni manderang, MeECL-ni bijoli wataniosa pangchake kamko ka·enga indiba mikka balwa ta·rakani somoirango aro badiaba badiaba salrangode bijolirang sina nangengani a·sel Jio network-ko man·jaenga. Network-ko name on·na gita diesel generator-rangko jakkalna man·achim indiba company-ni manderang, generator-rangko jakkalgija MeECL-ni bijoliosa pangchakskaenga,” ine Momin parakataha.
Ia jolrango bang·a manderangan Jio company-ni 2GB data plan-ko jakkalpagiparangsa ong·a ine janapatengon, ia jolrango Jio network-ko jakkalenggipa manderangni neng·nikanirangko namatna gita ta·raken ja·kurangko de·china Momin, Gasuapara jolo songdongenggipa manderangni pal didiataha.
