SHILLONG: Gitcham Health Minister Ampareen Lyngdoh, Meghalaya-o HIV/AIDS sagiparang batrikrikengani gimin iako champengna rakgipa ja·kuko de·na nangnikengani gimin aganaha.
Shillong-o police, noti-dari dakgiparangko (sex workers) am·sandie rim·ani gimin jajrengani gimin parakengon, Lyngdoh, indine aganaha, “HIV/AIDS sabisiara ramramgipa sabisi ong·ja, jekon simsake aro bilakgipa policy ba niamrangko ning·o nirok-simsakna nangenga. Mejaomangmang police-ni noti-dari dakgiparangko am·sandie rim·aniara, sorkari, bilaken kam ka·enganiko manderangna u·iatna ong·a.
“HIV/AIDS sabisiara simsake nirokna nanggipa ong·ani gimin policy aro guideline-ba kragipa niamrangko ja·rikna nirokna nanga ong·jaode champengna jotton ka·anio chu·sokna man·jawa.
A·gilsakni gimik bakrango rikgipa sorkarirangba HIV/AIDS sagiparang batrikrikangaon uko champengna gita rakgipa ja·kurangko de·a. Niatgenchimode Meghalaya-o sagiparang bang·dugaahani gimin authorities, gitcham policy-rangko nipilna gita nangenga ine Lyngdoh aganaha.
Minggipin sabisiko champengna ja·ku de·engon jinma manderang aro HIV/AIDS sagiparangni an·seng-baljokaniko skang done kam ka·na nanggen.
Sorkari, iani bidingo gisik nangbee kam ka·enga ine janape, Lyngdoh, indine agankuaha, “mission mode’-ko ra·gae ja·rikna jotton ka·enga. HIV/AIDS sagiparangko sanna gita sambolrang ba gipin sannani cholrangko nanga baksana uamangni gisikni chanchia, bimang an·seng-baljokani aro gisikni gita sinjetako man·anirangko nigrike sanna nanggen.
