SHILLONG: Gipinoni napdrabae songdonggipa manderangni a·sel, Salgro-Salaramo songpanggipa manderangna jajrengsona nangani kattarangko North East Students’ Organisation (NESO) parakaha.
Koborni manderangna aganengon, a·jolo songdonggipa manderang manderang jakchomsa gitan ong·aiani gimin Bangladesh-ko man·chape gipinoni manderangchi sinchepako man·enga ine NESO chairman Samuel Jyrwa aganaha.
Tripura aro Assamni mitam bakrango ong·enggipa obostarangko jaksi ote aganengon, a·joltangni manderangsa bikpile ganggopako man·enga aro a·jatangon komiangpilenga ineba ua aganaha.
Unomitingo, Meghalaya-ba apsandakgipa obostaon ong·engaha, iako jena man·jawa, unigimin Bangladesh-o ong·enggipa obostarangko niatenba a·dokni manderang mikrake dongna nangenga, uandake songsul a·dokrangoba simsaksona nangenga, Jyrwa aganaha.
Unigimin iandakgipa ka·mikkenatanirangna, songpanggipa mandetangni namgnina pilakan ku·cholsan ong·e warchaksona nange ineba NESO dilgipa ku·mongrimaniko on·aha.
