SHILLONG: Chief Minister Conrad K Sangma, Jingiaseng Kynthei Shillong Ri Lum Presbytery-ni Shillong Mawiong-o rikgipa Nabon Memorial Home-ko Sonibar salo nokdonggae on·aha.
Tom·anio jinma parakatengon, Chief Minister, Conrad K Sangma, indine aganaha, “Khasi-rangoni skangipa Christian me·chikni bimingo rikgipa ia nokara namen orto gnanggipa ong·a. Ian Christianity-ko ra·chakanisan ong·aija indiba salantini janggi tanganio Christian ong·e janggi tangani gimin ong·a aro sakgipinrangna duk neng·nikao ga·ake donggiparangna dakchakgrike janggi tangani gimin ong·a.
Iarangni gisepon Chief Minister, sorkarini a·dokni dingtang dingtang district-rango buchuma-budeparangna nokko rikna miksongani gimin parakangaha.
Ia kamo anganwadi centre-rang mongsonggipa ong·e kamko ka·anggiparang ong·gen.
Bi·sarang aro buchuma-budeparangni gisepo meligrikataniara songsalo kusi ong·begipa somoirangko ra·bagen. Bi·sarang, buchuma-budeparang baksa maidake agangrikna nanga aro mande ra·aniko skie ra·na man·gen. Uamang baksa melina man·gen ine aganaha. Indake ong·engon Chief Minister, Nabon Memorial Home-na Chief Minister’s Special Development Fund-oniko lak 25 tangka on·gilna parakaha.
