Be·enni gita cholgri ong·gipa mandeko doke siatanio jak donggiparangko rim·kujaenga ine matnanga

WILLIAMNAGAR: Re·anggipa April-ni 8 tariko, be·enni gita cholgri ong·gipa mande saksa, an·tangni noktangon adita sak manderangni jako dokako man·e ja·mano siangna gita nangaha aro ia a·selni bidingo sianggipa mandeni nokdang, police-rangna FIR ka·ahaoba da·alonan, dos dakgipa manderangko rim·kujaenga ine matnangataha.
FIR-o janapani gitade, doka man·gipa mandeni jikgipa aro uni pagipakoba ia manderang, kragija dake dokaha aro uamangba ia a·sel ong·anio bilongbee saknaanirangko man·na nangaha.
Koborko on·ani gitade, be·enni gita cholgri ong·gipa Talseng T Sangma, gisikni gitaba tik ong·gija saani dongachim.
Ia a·selni bidingo, dokako man·gipa mandeni nokdang, April-ni 9 tariko Williamnagar police station-o FIR ka·aha aro FIR-o janapani gitade, April-ni 8 tariko, komibeoba sak 16-mangni gita manderang, Talseng T Sangma-ni noko napdraenba, uko kragija dake dokna a·bachengaha. Ia apsan manderangan, uni jikgipa aro uni pagipakoba kragija dake dokaha ine FIR-o janapaha.
FIR-o Dagal Nachikol songni sak 13 manderangko aro Nangapa songoni sakgittam manderangko, ia mandeko aro uni nokdangko dokanina biming mingaha.
Dokako man·gipa Talseng Sangma-ba Dagal Nachikol songonin ong·achim aro ia manderang, uni jikgipa Merolin M Sangma aro uni pagipa Japansing M Marak-koba kragija dake dokaha ine FIR-o janapaha.
Dokako man·ani ja·man ia mande, bilongbee saknaanirangko man·ahani gimin uko ta·raken Songsak PHC-ona ra·angahachim indiba uko nambate sanna gita Williamnagar Civil Hospital-ona watatskaaha ineba ia mandeni ma·drangrang parakataha.
Indake ong·genchimoba, ia mande, Williamnagar Civil Hospital sokna skangan janggi galaha ine ma·drangrang parakataha.
Ia a·sel ong·ani salgipino sianggipa mandeni ma·drangrang, Williamnagar Police Station-o FIR ka·aha indiba ia a·sel ong·gipa Songsak police station-ode FIR ka·skajaha.
Ia mandeni siangaoni da·o salbri batangpilengahaoba, FIR-o biming minggipa manderangoni darangkoba rim·kujaenga ine ia mandeni ma·drangrang matnangatskaaha.