TURA: East Garo Hills a·jani Dobu songo ru·uta bilsirangna skangan Veterinary Centre-ko rikmanahaoba ia centre-o permanent doctor aro kam ka·giparangko rakkikujaengani a·sel songo noko jilla kaanirang saanirangko man·ani somoirango neng·nikanirangko chagrongna nangtokenga ine Dobu jolni dingtang dingtang dolrang, chong·motan AHAM, GSU aro FKJGP dolrang parakatenba, ia Veterinary Centre-ko ta·raken chalaina gita sorkari baksa agangrikchina Opposition dolni dilgipa Dr Mukul Sangma-na sedoataha.
Iani bidingo Opposition dolni dilgipa Dr Mukul Sangma-na seachi u·iatengon, ia veterinary centre-ko 2014 bilsion rikmanahachim indiba ia centre-o kam ka·gipa manderang dongjae, ia centre-ko chalaichipgija donengkua ine Dobu-ni dolgittam NGO-rang aro songni nokni dilgiparang parakataha.
“Chingni chang mol·molanirangko dakahaoba ia veterinary centre-na veterinary doctor-ko songe on·chipkujaenga. Ia veterinary centre-na kam ka·giparangko on·chipgija donaniara, Dobu jolni manderangna simsakgijaniko mesokanisa ong·enga,” ine NGO-rang parakataha.
NGO-rangni parakatani gitade, iani bidingo uamang a·dokni Chief Minister aro Veterinary department-naba sedoatahachim indiba da·alonan uamang maming aganchakanirangko man·kujaenga.
“Chingni jilenggipa matchu matterang saanirangko man·engmiting somoirango songni manderang neng·nikanirangko chagrongna nangenga ine chinga changni chang a·dok sorkarina aro department-naba u·iatahachim indiba da·alonan maming ja·kurangko de·kujaenga. Songo noko donggipa manderangna veterinary office-ko namen nangchongmota maina songni nokni manderangde, jilla kaanirangko dake cha·giparangsa ong·a. Ia office-ko kulie on·genchimode ian chingni chadamberangnaba kamrangko nakatate on·ani cholrang dongachim,” ine Dobu-ni NGO-rang aro Nokma-Sordarrang parakatenba, iani bidingo a·dokni Chief Minister aro a·dok sorkari baksa agangrikchina Opposition dolni dilgipa Dr Mukul Sangma-ko didiataha.
Dobu Vety Centre-o kam ka·giparangko rakkikuja ine NGO-rang matnanga
Date:
Share post:
