Gasuapara Block-ni adita songrango nok-jamrang bang·en nosto ka·ako man·a
TURA: Mongolbar pringwalo, Garo Hills-ni badiaba badiaba bakrango mikka balwa ta·rakan baksana stilrangba jimbee ga·akangaha aro mikka balwarang, South Garo Hills a·jani adita songrango bilongbatangaha. Mikka balwa ta·rakangan baksana stilrangba dal·dalbee ga·akanganichi, South Garo Hills a·jani adita songrango, bang·a nokdangrangan nangchakeaniko man·e, neng·nikanirangko chagrongna nangtokaha.
Koborko on·ani gitade, South Garo Hills a·jani Gasuapara Block ning·o komibeoba dambri songrango, stilrang dal·dalbee ga·akonangaha aro stilrang dal·dale ga·akanichi, bang·a nok-jamrang, bagan barirang aro manderangni gam-jinrang nisigalako man·angtokaha. Rangmai Aruwako songo komibeoba te 40 nokrang, Tojananggre-o te·sku nokrang aro Durida songo te 19 nokrang, stilrangchi nosto ka·ako man·angaha ine kobor on·timgiparang parakataha. Mibonpara songo komibeoba te 120 nok-jamrang nosto ka·ako man·angskaaha.
Ia songrango, nok-jamrang nosto ka·ako man·angan baksana noko jakkalgipa bosturang aro bagan barirangba nosto ka·ako man·e, songni manderang neng·nikanirangko chagrongna nangtokaha ine u·iataha.
Mikka balwa aro stil ga·akanio nangchakeako man·anggipa songrangara jolni MLA aro MDC Sengchim N Sangma-ni constituency ning·o ga·akgipa songrang ong·a aro songni manderang, maming dakchakanirangko man·kujaenga ine uko matnangataha.
Neng·nikanirangko man·enggipa nokdangrangna nanga gita dakchakanirangko on·chinaba songni manderang, dingtang dingtang dolrangko aro sorkariko didiataha.
