TURA: West Garo Hills a·jao Selsella-oni Phulbari-ona rama tarianirang namjaengani a·sel ramarang nosto ong·na a·bachengpilengaha ine Budbar salo, Selsella jolo dingtang dingtang NGO-rangni nangrime bikotgipa All Selsella NGOs Alliance (ASNA), Selsella-ni Block Development Officer-na seachi badi ka·doangaha.
Ia All Selsella NGOs Alliance-o Selsella-ni GSU, FKJGP, ADE, ASWA, NGCO aro ANYO dolrang bakrimengachim ine nikna man·a.
Selsella NGO-rangni parakatani gitade, ia ramako Midas Construction company jako ra·e tariengachim indiba kamrangko name ka·jaengani a·selan ia ramarang taria matchotna skangan nosto ong·na a·bachengengaha.
“Ia ramako da·o taria matchotsrangkujaenga indiba kamrangko name ka·jaengani a·sel da·on ramarang nosto ong·na a·bachengengaha. Ia ramani ta·raken nosto ong·na a·bachengpilaniara, kam namgijako, namgijagipa bosturangko jakkalaniko aro rama tariengmiting somoirango nirok sandianirang donggijako mesokani ong·a. Iandake kamrangko ka·anio simsakgijaniara, manderangni tangka paisarangko indin bon·atasan ong·aija indiba ia ramako salanti re·ruraenggipa manderangna neng·nikanirangko ra·baani gitaba ong·enga,” ine ASNA-ni dilgiparang parakataha.
ASNA-ni parakatani gitade, ia Selsella-Phulbari ramara, Selsella, Balachanda aro Kalchengpara songni manderangna mongsonggipa rama ong·a maina ia ramakon dingtang dingtang songni manderang, lekka porana, an·seng baljokanina, bading chiwalani kamrangna aro dingtang dingtang nangchongmota kamrangna jakkaltokpaenga.
“Ramako taria matchotsrangkujaengon ramarang nosto ong·na a·bachenganiara, contractor-ni kamrango ka·dongna man·gijaniko ong·ata. Ia rama tarianiko nirok sandia gri ka·na on·angkuaia ong·ode, ia rama ta·raken nosto ong·e re·naba namsrangjawaha aro ramako taripiltaitaina gita sorkari, tangka paisarangko koros ka·na nanggen,” ine ASNA-ni dilgiparang parakataha.
Indake ong·engon, ia rama tarianiko ta·raken nirokatchina, Midas Construction company-ni jakkalenggipa bosturangko name nipilchina, ong·gija dakanirang ba niam pe·anirang donga ine nikgenchimode contractor-ni kosako rakgipa ja·kurangko de·china, nosto ong·gimin ramani bakrangko namgipa bosturangko jakkale tariatpilchina aro mikkangchi iandakgipa obostarang ong·taijana gita rakbate nirok sandianirangko dakchina ASNA dabiangaha.
