SHILLONG: Re·baenggipa Shillong Parliamentary Bye Election-o saksa MDA-ni gita nangrime susaatani dongjawa gita nika, maina MDA-ni gita nangrime saksa candidate-ko susaatani bidingo da·alona maming chanchigrikani dongkuja aroba NPP aro BJP dolgnian an·tangtangni candidate-rangko susaatna gita taritokenga ineba nikatna man·a.
Unomitingo MDA candidate-na chakgenma ma party-ni gita susaatgenma iani bidingo party, ru·utgijan tom·e chanchirimgen ine UDP dilgipa Ollan Sin Suin Sukrobar salo aganaha.
MDA-ni gisepo maiba neng·nikgrikani dongama, indake NPP aro BJP dolgnian paltangtang susagrikna tarienga ine sing·anina aganchakengon, MDA-o bakrimgiparangni gisepo maming cha·chipilani dongja, bakrimgipa gimik party-an a·dokni dal-roro-silrorognina chanchichigiparangsa ine Suin aganchakaha.
“MDA, chinga pilakna simsaka aroba MDA-o bakrimanio chingo maming neng·nikani dongja,” aro UDP-o darangni gisepoba gadangna rikani dongja ineba Suin aganaha.
VPP-ni bilakbaenganichi MDA-na maiba kenchakani dongama ine sing·anina aganchakengon, political dol ge·antian an·tangtangni chanchiani aro, uandaken UDP-ba an·tangni chanchianio re·gen, darangni bilakbaaninaba dakgrikani dongja, ua aganaha.
Ua indakeba aganaha je, mikkang 2028 Assembly Poll-ode UDP uamangni seat-ko duna gittam ong·atgen.
