Kamrang 47% matchotaha
SHILLONG: New Shillong Township-o rikenggipa a·dokni gital Secretariat-ko re·baenggipa 2027 bilsini September jao matchotna gita a·dok sorkari, nisanko donataha.
Da·o dipet gital Secretariat-ko rikani kamrang tong·sade matchotangengaha aro kamrangko joljol ta·raken ka·engaha.
Sorkari official-rangni u·iatani gitade, da·o dipet gital Secretariat-ko rikani 47 percent matchotaha aro ia gital building-ni gittamgipa slab-koba matchotaha.
Ia gital Secretariat-ko gong kror 1188 korosrangchi rikenga aro ia gital Secretariat-na re·anggipa 2025 bilsini January 21 tariko pangchakaniko songahachim.
“New Shillong Township-o rikenggipa gital Secretariat-ko mikkang bilsini September jaon matchotna gita krenge kamrangko ka·enga,” ine official-rang aganaha.
Indake ong·engon, New Shillong Township Water Supply Scheme-ko rikna gitaba kamrangko ta·rakatchina sorkari ge·etaniko on·manaha ine official-rang parakataha.
Ia gital Secretariat-ko Umsawli-ni acre 53 ong·gipa a·ao rikenga aro ia building-ko matchotahaode ia biapara administrative city-san ong·aigija Shillong songjinmao apchangket ong·aniko komiatna dakchakgnok ineba official-rang parakataha.
