Top 10-o pass ka·gipa chatro chatri sakgnian Nokgipa Isolko mittelpila
TURA: Ia 2026 bilsio Meghalaya Board of School Education (MBOSE)-ni ong·atgipa Higher Secondary School Leaving Certificate (HSSLC) Science porikkao, Tura Don Bosco College (Higher Secondary Section)-ni chatro chatri sakgni, Top 10-ni skanggipa aro chikkinggipa biapko man·e, college-nasan ong·aigija A·chik jat aro Garo Hills gimiknan mikkim rasongko ra·baaha.
Pangnande Top 10-ni skanggipa biapko Shillong-ni dingtang dingtang skul aro college-rangsa man·rongbataiachim aro Garo Hills-oni ia biapko man·genchimoba, gipin jatrangna man·rongbataiachim indiba ia changde Science stream-o Top 10-ni skanggipa biapkon A·chik chatro Dechro M Marak man·enba, A·chik jatna aro Garo Hills gimiknan mikkim rasongko ra·baaha. Unbaksana apsan college-ni chatri, Aime Azora G Momin-ba, Top 10-ni 10-gipa biapko man·e, an·tangni college-nasan ong·aigija, A·chik jatna aro Garo Hills gimikna mikkim rasongko ra·baaha.
Top 10-ni skanggipa biapko man·gipa Dechro M Marak, 472 mark-rangko man·aha aro 10-gipa biapko man·gipa Aime Azora G Momin, 449 mark-rangko man·e chu·sokgipa ong·skaaha.
HSSLC Science porikkao teng·sugiparang ong·e, college-na, jatna aro Garo Hills gimikna mikkim rasongko ra·baahani gimin Sombar salo, Don Bosco College (Higher Secondary Section)-ni gita uamang sakgnina mande ra·pilskaani program-ko college-o ong·atangaha aro ia program-ko ong·atanio, uamangni ma·a paarangkoba okamate, mande ra·pilskaaniko dakangaha.
Ia porikkao namgipa result-rangko man·ahani gimin college-ni Principal Fr Jogesh B Sangma, dingtangmancha chatro chatri sakgnina aro uamangni ma·a paarangnaba mande ra·pilskaani kattarangko aganangaha.
Ia bilsini HSSLC Science porikkao chegopgipa Dechro M Marak, an·tangni chu·sokgipa ong·aniko talate on·angengon, Nokgipa Isolko, an·tangni ma·a paako, college-ni Principal-ko, skigiparangko aro an·tangni ripengskarangkoba mittelpilangaha.
HSSLC Science porikkao A·chikrangoni skanggipa ong·e Top 10-ni skanggipa biapko man·ahani gimin kusi ong·aniko parakatengon, ian uni ripengskarangnaba didiani ong·china ine Dechro aganaha.
Poraina somoi ra·jringachi, namgipa bewalrangko ja·rikachi aro Nokgipa Isolo bebera·anichi ia chu·sokaniko ua man·aha ineba Dechro, an·tangni chanchianiko parakataha.
Dechro-ni aganani gitade, ua porikkana tarisamsoengon, dingtangmancha somoiko done poraiade ong·ja indiba salantian kontagni ba konta gittam poraironggipa ong·achim.
Adita salrangna skangsan ua ia bilsini NEET porikkako seaha aro NEET-ni result-ko man·ani ja·mansa ua nanga gita ja·kuko de·anggen ineba Dechro parakataha.
Ua video nina namnikgipa aro git knana namnikgipa ong·a ineba Dechro aganaha.
Ia Science porikkao Top 10-ni chikkinggipa biapko man·e pass ka·anggipa Aime Azora G Momin-ba, an·tangni chu·sokgipa ong·anina Nokgipa Isolko, ma·a paako, skigiparangko aro college-ni principal-ko mittelpilangaha.
Porikkana ua badita kontarang poraisoaha ine sing·anina aganchakaniko on·angengon, ua dingtangmancha routine-ko done poraiade ong·ja indiba porikkana skang jagnirangonin ua salo konta 10-konta 12 ka·e poraina a·bachengaha ine Aime Azora aganaha.
Uaba adita salrangna skangsan NEET-ko seaha aro mikkangchi ja·kuko de·na skang, NEET-ni result-na sengengkua ine Aima Azora aganaha.
