Ja 15-ni gisepon kamrangko matchotnaba gnang
SHILLONG: Meghalaya a·doko tourism aro re·a doani cholrangko tang·doatna gita Shillong airport-ni runway-ko bakrodapate tarina ma·mong sorkari, contract-ko on·manaha ine Budbar salo, a·dokni Chief Minister Conrad K Sangma parakataha.
Ia kamko ja 15-ni gisepon matchotna ka·dongenga ine janapatengon, kamrangko matchotahaode Shillong airport-oni dal·kalgipa sildorengrangkoba watna man·gnok ine Chief Minister parakataha.
Iani bidingo, Umiam-ni Orchid Lake Resort-o ong·atanggipa program-o jinmana aganprakangengon, Shillong airport-ko dal·batatna gita re·anggipa April jani 1 tarikon India sorkari, work order-ko on·manaha aro kamrangko bakan a·bachenggnok ine Chief Minister parakataha.
“Shillong airport-ni runway-ko bakrodapatna gita kamrangko on·manaha ine anga na·simangna u·iatna kusi ong·a. Ia work order-ko April-ni 1 tarikon India sorkari on·manaha aro ia kamko ta·raken a·bachenggnok. Shillong airport-ni runway-ko bakrodapatani kamrang ja 15-ni gisepon matchotgen ine ka·dongenga aro an·ching Shillong-ona dal·kalgipa sildorengrangni onchongako nikna man·gnok. Ian Tourism-ni kamrango dingtangataniko ra·bagnok,” ine Sangma aganaha.
Shillong airport-ko dal·batatanio, 10,500 square metre-ona barignok aro ia kamko ka·anio gong kror 500-mang koros ong·gen.
Da·o dipet Shillong airport-ni runway bakkandikani a·sel chonchongipa sildorengrangsan Umroi-oni bilrurana man·kuenga indiba ia airport-ko dal·batatahaode, Airbus A320 gita dakgipa sildorengrangba ia airport-o onchongna man·gnok.
Official-rangni u·iatani gitade, Shillong airport-ko dal·bate tariahaode Shillong songjinmaoni, Mumbai, Bengaluru aro Chennai gita dal·dalgipa biaprangonaba sildorengrangko joljol watna man·gnok aro Guwahati airport-rango pangchakna nangjawaha.
Indake ong·engon, Shillong airport-ko dal·batatna gita Environment, Forest & Climate Change Ministry-ni environmental clearance-ko man·aha ine adita salrangna skangsan Meghalaya High Court-ba parakataha.
Airports Authority of India (AAI)-ni pal gital status report-ko kacharina on·ani gitade, ia airport-ko dal·batate tarina kamko KCC Buildcon Pvt Ltd-na on·aha.
