SHILLONG: A·doko ta·makku jakkalaniko champengna aro ta·makkuoni jakgitel ong·gipa songsalko ong·atna miksonganio, World No Tobacco Day (WNTD) 2026 campaign-ko Meghalaya a·dokni pilak biaprangon a·bachengataha.
World No Tobacco Day-ko a·gilsak gimikon May jani 31 tariko manironga aro ia salko maniani bak gita manderangna ta·makku jakkalani namgijaniko u·iatna ia WNTD 2026 campaign-ko a·dokni pilak biaprangoba a·bachengataha. Batanggimin bilsibrina ia WNTD campaign-ko ong·atanichi, a·dokni dingtang dingtang biaprango dam 9000-na baten skulrang aro sak lak 6-mangni gita chatro chatrirang, jinma re·jomanirangko, signature campaign aro awareness program-rangko ong·atanio bak ra·angtokaha.
Ia bilsioba WNTD 2026 campaign-ko re·anggipa April 6 tarikon a·bachengaha aro ia campaign-ni bak gita April aro May jarango dingtang dingtang skulrang aro college-rang, ta·makku jakkalani bidingo mikrakataniko on·na jinma re·jomanirangko aro signature campaign-rangko ong·atenga.
Ia program-ko a·bachengatanio, Health Department-ni ning·o donggipa National Tobacco Control Program-ni State Nodal Officer Dr Nabaneeta D Mawrie, jinmana aganprakengon, Meghalaya a·doko bang·a manderangan ta·makkuko jakkaltokani a·sel dingtang dingtang sabisi sakanchirangko man·enga ine an·tangni suk ong·gijaniko parakangaha.
“Ta·makkuko jakkalaniara rantamangmangsan ong·ja indiba ian an·chingni chadambe aro manderangko nisigalna tarigipa bostu ong·a. Meghalaya a·doko bilsi 15 aro una batgiparangoni tong·sade ta·makku jakkalgiparang ong·ani gimin bilsiprakon dingtang dingtang sabisirangko man·e sak 8000-mangni gita manderang sirongenga,” ine Dr Mawrie aganaha.
Ia WNTD campaign-ara, dingtang dingtang skul aro college-rangna, rally-rangko, signature campaign-rangko aro awareness program-rangko ong·atanichi manderangna mikrakataniko on·na okamani ong·enga ineba ua aganaha.
Sambandh Health Foundation baksa nangrime, Tobacco Free Educational Institutions (ToFEI)-ni ning·o chu·sokatgipa kamrangni giminba Dr Mawrie janapangaha.
Ia program-o Education Department-oni Jennyfer J Synrem-ba aganprakengon, WNTD 2025-o bang·a skul-college-rang aro chatro chatrirang bak ra·ahani gimin a·doko chatro chatrirangni aro skul-college-rangni gisepo mikrakbataniko mesokani ong·aha ine parakataha.
South West Garo Hills a·jani Deputy Commissioner Anendya Raajsshre-ba ia tom·anio jinmana aganprakengon, awareness campaign-rangko ong·atanichi manderangni dakbewalrangko dingtangatanio pilakkon bakrimchina didiangaha.
