TURA: South Garo Hills a·jani dingtang dingtang biaprango, mongsonggipa PMGSY ramarangko name tarijani a·sel, ramarang nosto ong·e songni manderang aro ramako re·ruraenggipa manderang neng·nikanirangko chagrongna nangtokenga ine ia ramarangko tarigipa contractor-rangni kosako South Garo Hills a·jani social activist Greneth M Sangma, PWD (Roads) Baghmara Division-ni Executive Engineer-na badi ka·doangaha.
PWD (Roads) Baghmara Division-ni Executive Engineer-na badi ka·doangani gitade, Karukol-oni Emangre-ona Nengkhong gita km 16 ong·gipa PMGSY ramako tarina gong lak 1722.65 tangkarangko chame on·ahachim indiba ia ramani metre 970 bakrangde Black Topping on·na machotchipjaha aro unbaksana ia ramao nalarang aro retaining wall-rangkoba tarijahani a·sel mikkarang waahaon, ia ramarang ta·raken nosto ong·piltaiaha.
Nengkong Songmong-oni Upper Dosogre-ona dakanggipa km 9.27-ni ramako tariani bidingo janapatskaengon, ia ramako tarina gong lak 1628.70 tangkarangko chamahachim indiba ia ramani km 1 ong·gipa bak a·arang rurongdape, black topping on·gipa bakkode man·angaha aro ia ramako tarianio km 9 ong·gipa bako chiringni jokako champengenggipa a·dubekko galchipjaha ine Sangma parakataha.
Mindikgre-oni Gara Songgital-ona km 3.053 ong·gipa PMGSY ramako tariani bidingo janapatskaengon, ia ramako tarina gong lak 650.66 tangkarangko chamaha indiba ia ramani bon·ao slab culvert-ni be·gruaniko official-rang nikna man·aha ine Sangma parakataha.
“Iandake ramako namgijani tarianiara, re·ruraenggipa manderangna aro Mindikgre baksana Gara Songgital songni sak 642 manderangna kenchakna nangani ong·enga,” ine Sangma parakataha.
PWD (Roads) official-na badi ka·e sedoatanio Sangma-ni parakatani gitade, Emangre-oni Nokatgre songona km 2.50 ong·gipa PMGSY ramako tarina gong lak 170.81 tangkarangko chamaha aro ia ramako 2021 bilsini May jaon chu·gimik matchotaha ine report-o mesokahaoba, ia rama, Meghalaya Road Maintenance Policyni ning·o bilsi bongani routine maintenance-ko man·kujaenga.
“Ia ramarangko name tarijani a·sel salanti kam nangana re·ruraenggipa manderang, mongsongbate skulrangchi re·enggipa bi·sarang neng·nikanirangko chagrongna nangtokenga,” ine Sangma parakatenba, ia ramarangko taraken niatchina didiataha aro nanga gita ja·kurangko de·jagenchimode Consumer Court-o badi ka·anggen ine mikrakataniko on·angaha.
