AMPATI: South West Garo Hills a·jani Garobadha-Dalu ramao donggipa Betasing dolong nosto ong·angengaha ine koborrangko man·soahani gimin ia dolong gita dal·dalgipa garirangni re·ruraaniko South West Garo Hills a·jani District Administration champengatchengaha.
Manderangna naljokaniko on·na gita ia ge·etaniko, South West Garo Hills a·jani District Magistrate Kum Anendya Raajsshre, Bharatiya Suraksha Sanhita (BNSS) 2023-ni Section 163-ni ning·o on·ataha.
Official-rangni u·iatani gitade, Betasing-o donggipa dolong, May-ni 14 tariko nosto ong·roroangengako nikna man·aha aro ian ia dolong gita re·ruraenggipa garirangna aro manderangna kenchakna nangani ong·enga ine nikaha.
Ia dolong gita dal·dalgipa garirang re·ruraaikugenchimode, ia dolong nosto ong·roroange be·gruani cholrang donga ine nikenba, ia dolong gita dal·dalgipa garirangni re·ruraaniko champengatchengaha.
Ia dolongko taripilna man·kujaskal ia dolong gita bostu salgipa truck, bus, tanker, tipper, dumper aro dal·dalgipa garirangni re·ruraaniko champengatchengaha.
Dal·dalgipa garirangna District Administration, dingtang ramako tik ka·e on·angskaaha.
Official-rangni u·iatani gitade, dal·dalgipa garirangko, Betasing-oni Ishaguri-ona PMGSY rama gita re·ange, Garobadha-Mankachar rama gita Mirjumla-ona re·angchina aro ja·mano Ampati-Mankachar rama gita Ampati-ona re·angchina u·iataniko on·angaha.
Ia dolong gita dal·dalgipa garirangni re·ruraaniko bilaken champengchina aro mongsonggipa biaprango barricade aro chinrangko donatchina gitaba District Magistrate, SWGH a·jani Superintendent of Police, District Transport Officer aro PWD (Roads)-ni Executive Engineer-na ge·etaniko on·ataha.
Ia niamko pe·genchimode rakgipa sastirangko man·gen ineba SWGH a·jani District Magistrate, mikrakataniko on·angaha.
Betasing dolong nosto ong·ani gimin dal·dalgipa garirangko champengata
Date:
Share post:
