TURA: 2014 bilsio sorkari baksa Agreed Text for Settlement (ATS) ba songgigrikanio soi ka·grikgipa manderang, adita salrangna skang, South West Garo Hills a·jani Jewilgre songo rikenggipa Architecture & Urban Planning College-ko nina re·angenba, ia college-ko rikani kamrang, nanga gita ong·jaenga ine suk ong·gijaniko parakataha aro ia college-ko nambate rikchina dabiangaha.
ATS-o soi ka·giparangoni membor saksa aro Tura-ni MDC Bernard N Marak-ni parakatani gitade, ia Architecture & Urban Planning College-ko All India Council for Technical Education (AICTE)-ni ra·chakaniko man·ahaon, 2026-2027 bilsini academic session-ko a·bachengatna miksongengahachim indiba adita salrangna skang, uamang ia college-ko nina re·angon, college-ko rikanio kamrang, tangka paisa chamani kride ong·jaha ine nikna man·aha.
“Ia college-o sak 30 chatro chatrirangko ra·na biaprang donga aro ian Meghalaya a·dokna mingsa chu·sokani ong·engachim. Indiba ATS-o soi ka·giparang, ia college-ko nina re·angon, kamrang namjani gimin suk ong·niktokjaha,” ine Marak parakataha.
Ia college-ko rikna 2018 bilsio, RUSA-2-ni ning·o gong kror 26 tangkarangko chamatahachim ine janapatengon, ia college-ko rikanio kamrang namen ja·manchakaha aro kamrangko State Higher Education Council (SHEC), nirokna simsakjaha ine ATS-o soi ka·gipa membor-rangoni saksa ong·e, Marak parakataha.
Dingtang dingtang neng·nikanirangko chagrongna nanggenchimoba, Council of Architecture (COA) aro AICTEA-ni ra·chakako man·ahaon ia college-ni academic session-ko 2026-2027 bilsionin a·bachengna siengaha ine janapatskaengon, ia college-ko rikanio do·garang, cement paint-rang aro tiles on·anirang, chamatgipa koros gita ong·jaha aro iako ATS-o soi ka·giparang chu·ongnikjaha ine Marak parakataha.
