SHILLONG: Batanggimin bilsirango United Democratic Party (UDP), Meghalaya a·doko bilakbatsranggipa regional party-rangoni dolsa ong·achim indiba da·o dilgipana dilroroangenganichi, ian party-ni bilgriroroangengako mesokani gita ong·skaengaha.
Kobor on·timgiparangni u·iatani gitade, Shillong Lok Sabha by-election-o susana gita UDP, candidate-kon man·jaenga aro ian Khasi aro Jaintia Hills a·jarango UDP-ko Voice of the People’s Party (VPP)-ni bil sekako mesokani ong·enga.
Shillong Parliamentary by-election-na da·o tarikrangko parakkujaengoba, ia election-o UDP-ni susana gita name ma·sikujaenganiara, dilgipana dilako mesokani ong·a ine kobor on·timgiparang parakataha.
Kobor on·timgiparangni aganani gitade, UDP-ko dilenggiparangni gisepo meligrikgijanirangkoba nikna man·engaha aro mitam member-rangde an·tangtangni suk ong·gijaniko parakna ba gipin party-rango napangna gitasa somoina senge dongskatokenga.
2028 bilsini Assembly election-na skang, UDP-ni bang·bata MLA-rangan gipin party-rango napangani cholrang dongaiaha ineba kobor on·timgiparang parakataha.
Koborko man·soani gitade, Shillong Lok Sabha by-election-o gitcham cabinet minister aro party MLA Paul Lyngdoh-ba susana gita jechakaha aro 2024 bilsini Parliamentary election-o party candidate ong·e susagipa Robertjune Kharjahrin-ba da·o susataina gita nangnikjaengaha.
Shillong Parliamentary by-election-o susana gita Congress dolde gitcham MP Vincent Pala-ko, NPP-ba Khasi Authors Society (KAS)-ni president Dr DRL Nonglait-ko aro VPP-ba party-ni dilgipa Batskhem Myrboh-ko susaatna tik ka·manahachim.
BJP-ba ia by-election-o susana miksongenga indiba da·o dipet candidate-ko parakskakujaenga.
Re·anggipa February-ni 19 tariko, Shillong-ni Lok Sabha MP Ricky Andrew J Syngkon-ni tanggitik saaniko man·e siangani ja·man da·o Shillong Parliamentary Constituency-ni by-election-ko ong·atna nangengachim ine nikna man·a.
