Kangal cholgrirangoniko tangka gilanina VPP-ko matnanga
SHILLONG: Election-na campaign ka·ani somoirango Voice of the People’s Party (VPP)-ni manderangna aganani aro 2023 bilsini election-o Election Commission-na affidavit ka·anio namen dingtanggrikanirang donga ine a·doko bobil dake chakatenggipa Hynniewtrep National Liberation Council (HNLC) dol matnangataha.
Iani bidingo kobor setimgiparangna seachi parakatengon, VPP-ni president aro Nongkrem MLA Ardent Miller Basaiawmoit-ni election-na campaign ka·ani somoirango pangnan manderangko party-na on·gilchina didironga indiba 2023 bilsini election-o uni affidavit ka·ani gitade, uno gong kror 1.49-na baten gam-jinrang donga ine HNLC-ni general secretary Sainkupar Nongtraw matnangataha.
“Election Commission-o affidavit ka·aniko nigenchimode VPP-ni manderangna mesokani aro dilgiparango gam-jin donganiara namen dingtanggrika. VPP-ni president Ardent Miller Basaiawmoit, hajira ka·e cha·enggipa aro game ge·e cha·enggiparangko, uamangni neng·e man·enggipa tangka paisarangko party-na on·gilchina aganaha indiba uni election-na affidavit ka·ani gitade uno, gong 1,49,15,089-ni gam-jinrang donga,” ine HNLC-ni general secretary parakataha.
Nongtraw-ni parakatani gitade, VPP-ni president Ardent Basaiawmoit-o gong 1,49,15,089-ni chu·gimik gam-jinrang baksana Laitkor-o gong kror 1-ni nok, lak 35-ni a·arang, lak 6.7-mang ong·gipa Jeep, Bolero aro Royal Enfield garirang, lak 1.92-ni sonarang aro gong lak 6.15 tangkarang bank-o aro nogot donga ine affidavit-o mesokaha.
Election-na campaign ka·engmiting somoirango VPP-ni dilgiparang, ‘Chingade kangalsa. Chingode tangka paisa dongja. Chingade na·simang manderangon pangchakgiparangsa’ ine tangka paisarangko on·gilchina didironga indiba ia apsan mandeon, gong krorsani gadang gittam nok donga, Shillong-o lak 35-ni a·a damgni donga, baditaba bol garirang aro sonarang donga ineba HNLC-ni general secretary parakataha.
Songsalo kangal cha·a-sianiko bon·atna, tom·tomani aro namroro silroroaniko ra·baan baksana jatni daka rikanirangko ripinge rakkina gita 2023 bilsini February 15 tariko VPP-ni ku·rachakanggipa election manifesto-ni gimin janapatengon, “Sing·anide, VPP-ni dilgiparang, kangal cha·a siako bon·atna kam ka·engama ma iani namgniko man·enga?” ine Nongtraw sing·doataha.
“VPP-ni dilgiparang, an·tangtangko cholgri dake mesokengon, manderangsa an·tangtangni neng·e man·gipa tangkarangko party-na on·giltokenga aro campaign-naba garirangko on·enga,” ine HNLC matnangataha.
Nongtraw-ni parakatani gitade, 2023 bilsini election-o VPP MLA-rangni affidavit ka·anio, Nongkrem-ni MLA Ardent Basaiawmoit-o gong kror 1.49, Mawryngkneng-ni MLA Heaving Stone Kharpran-o kror 1.09, Mawlai-ni MLA Brightstarwell Marbaniang-o gong lak 41.85 aro Shillong-ni MLA Adelbert Nongrum-o gong lak 13.61-ni gam-jinrang donga ine nikna man·aha.
“Ia MLA sakbrian, maming man·gnirang dongja ine parakaha indide uamangni janggi tanganio sawa tangka paisarangko on·e dakchakenga? Gam-jinrangko brena, gari gorarangko jakkalna aro election campaign ka·na gita banoni tangka paisarangko man·aha?” ineba HNLC-ni general secretary sing·doataha.
VPP-ni MLA Nongrum saksamangmangsan lak 13.61-ni gam-jinrang dongaiani gimin party-ni a·kanga gita ong·enga maina uno a·arangba dongja, nokba dongja aro 2014 bilsini Scorpio garimangmangsan dongaia ine Nongtraw parakataha.
